Dövlət İmtahan Mərkəzinin (DİM) yaydığı məlumata görə, bu il ali təhsilin magistratura pilləsinə qəbul olunanların yarısının imtahanda topladığı bal 53-dən yüksək olub. Ötən il il bu göstərici 51 baldan az olub.     

Ümumiyyətlə, son illərdə imtahan iştirakçılarının nəticələrinin yaxşılaşdığını hiss olunur. Belə ki, 2014-2016-cı illərdə magistratura pilləsində 50 baldan yuxarı nəticə göstərənlər imtahanda iştirak edənlərin təxminən 25-32 faizini təşkil edib. Bu il 90 va daha yuxarı bal toplayanların sayı 162 nəfər, 80 və daha yuxarı bal toplayanların sayı 1123 nəfər, 70 və daha yuxarı bal toplayanların sayı 4012 nəfər olub. 2022-ci ildə anoloji göstəricilər isə müvafiq olaraq 74, 591 və 2240 nəfər olub. 

Təhsil eksperti Kamran Əsədov Valyuta.az-a açıqlamasında bildirib ki, iki amil magistratura pilləsinə qəbulda yüksək nəticələrin əldə edilməsinə imkan verib:

“Bu il magistratura pilləsində iştirak edənlərin say tərkibinə baxanda görürük ki, keçən illə müqayisədə cari ildə 0-30 arası bal toplayanların sayı azalıb. Eyni zamanda, daha yüksək bal toplayanların sayında artımlar baş verib. Bu da iki səbəbdən irəli gəlir. Əvvəlki illər pandemiya dövrü olduğundan uşaqlar ciddi hazırlaşmaq imkanlarına malik olmayıblar. Digər tərəfdən, artıq müəllimlər imtahana hansı və necə sualların düşəcəyini bilirlər. Deməli, imtahan modeli müəllimlər üçün tanışdır. 

Bu il magistratura imtahanında 24118 nəfər iştirak edib, 2022-ci ildə isə bu rəqəm 20800 nəfər idi. Bu il 95-dən yuxarı bal toplayanların sayı 29 nəfər olub, keçən il isə cəmi 14 nəfər. Bütün bu irəliləyiş ona görədir ki, magistratura pilləsində istifadə olunan suallar artıq müəllimlərə bəllidir. Bakalavrlarımız artıq imtahan modelinə hazırdır, DİM-in onları nə ilə yoxlayacağını bildiklərinə görə nəticələr də yüksəkdir”.

Ramiz