Milli Hidrometeorologiya Xidmətindən verilən məlumata görə, iyunun 18-də Gədəbəy, Daşkəsən, Tovuz, Gəncə, Göygöl, Naftalan, Yevlax, Qusar, Quba və Goranboya dolu düşüb, leysan xarakterli yağış yağıb.

Məlumata görə, saat 15:13 radələrində Goranboy rayonu Böylü qəsəbəsindən sel keçib. Saat 15:10 radələrində Ağdam rayonu Çəmənli və Sarıcalı kəndləri ərazisinə diametri 30-35 mm dolu düşüb. 

Tovuzun Yuxarı və Aşağı Öysüzlü kəndləri, Qaziqulu kəndinin bir hissəsində sel suları fəsadlara səbəb olub. Güclü yağış və külək bir neçə evin yardımçı tikililərinin uçmasına səbəb olub. Elektrik enerjisinin verilişində fasilələr yaranıb.

Əksər rayonlara yağan dolu məhsuldarlığa, dolayısıyla qiymətlərə görəsən, necə təsir edəcək?

Kənd təsərrüfatı üzrə mütəxəssis Vahid Məhərrəmli Valyuta.az-a açıqlamasında bildirib ki, baş verən təbiət hadisəsi ölkədə kənd təsərrüfatı məhsulları üzrə məhsuldarlığın aşağı düşməsi və qiymətlərin bahalaşmasına səbəb olacaq:

“Təbiət hadisəsi, dolu və leysan nəticəsində dəyən ziyanın ilk növbədə maştabı öyrənilməlidir. Ona uyğun olaraq da dəymiş ziyana görə fermer və kəndlilərə müəyyən qədər kompensasiya verilməlidir. Digər tərəfdən, dolu düşməsinin qarşısını almaq üçün onu neytrallaşdırmaq lazımdır. Bunun üçün də xüsusi toplar var. Onları alıb dağ rayonlarında quraşdırmalıyıq. Həmçinin, sel sularının əkin sahələrinə, evlərə ziyan vurmaması üçün böyük həcmdə suyun yığılmasına imkan verən bəndlər salınmalıdır. Həmin sudan da sonra suvarma işlərində istifadə etmək olar. 

Bütün hallarda yağan leysan və dolu ölkədə kənd təsərrüfatı məhsulları üzrə məhsuldarlığı aşağı salacaq. Bu sahədə istehsala ciddi ziyan dəyəcək. Məhsuldarlığın aşağı salınması isə məhsulun və təklifin azalması demək olacaq. Bu da öz növbəsində qiymət artımına rəvac verəcək. İdxal məhsulu da öz növbəsində artacaq”.

Ramiz