Dünyanın nüfuzlu nəşri "Bloomberg news” Rusiyanın Ukraynaya hərbi təcavüzünün dünyada ciddi ərzaq çatışmazlığı problemi yaradacağını iddia edib. Nəşr qeyd edib ki, bu iki ölkə dünyanın əsas taxıl ixracatçılarıdır. İnsanların enerji tələbatının 40% də buğdanın, qarğıdalı və düyünün hesabına ödənilir. Nəticədə dünyada bu məhsulların qiyməti təxminən 22% artacaq, bu da 45 milyonadək insanın aclığa məruz qalmasına səbəb olacaq.

Valyuta.az xəbər verir ki, bu fikri şərh edən "Şərq-Qərb” Araşdırmaları Mərkəzinin rəhbəri Ərəstun Oruclu qeyd edib ki, bu, ürəkaçan proqnoz deyil, əlbəttə. Başqa bir təhlükə isə silahlanmaya xərclərin artacağı tendensiyasıdır:

"Ukrayna böhranınadək müdafiə sahəsinə ÜDM-in 1,3% xərcləyən Almaniya bu rəqəmi 2% qaldırıb. Əvvəl 70 mlrd avro təşkil edən hərbi büdcə gələn il 100 milyard avroya çatdırılacaq. Bu da öz növbəsində sosial xərclərin azaldılması deməkdir”.  

Çin-ABŞ münasibətlərindən də danışan ekspert bildirib ki, bu münasibətlər də əvvəlki qədər hamar görünmür:

"Rusiyanın Pekindən silah və hərbi sursat istəməsinə ABŞ ani reaksiya verib. Çinə bu addımı atacağı halda adekvat addımlarla üzləşəcəyi barədə xəbərdarlıq olunub. 

Buraya Səudiyyə Ərəbistanı şahzadəsinin və Dubay əmirinin ABŞ prezidenti ilə telefon danışıqlarından imtina etməsini əlavə etdikdə gərginliyin coğrafiyasının bir qədər də genişləndiyini görürük. 

Nəhayət, İranın İraq Kürdüstanındakı ABŞ konsulluğunu raket atəşinə tutması və digər məsələlər də proseslərin yüksələn xətlə inkişaf etdiyini göstərir. Təbii ki, müsbət heç bir şey vəd etməyən xətlə. 

İndi sual budur ki, növbəti mina harada və hansı gücdə partlayacaq: Yaxın Şərqdə, Avropada yoxsa Uzaq Şərqdə? Belə minaların sayı isə lazım olduğundan dəfələrlə çoxdur. Hələlik isə Rusiya Ukrayna cəngəlliyində çapalamaqdadır”.