Bu ilin may ayında Azərbaycan 6,8 milyon ABŞ dolları dəyərində ilkin formalı polietilen ixrac edib.

Valyuta.az xəbər verir ki, bu barədə İqtisadi İslahatların Təhlili və Kommunikasiya Mərkəzinin təqdim etdi “İxrac icmalı”nın iyun sayında qeyd olunub.

Məlumata görə, bu, ötən ilin eyni ayı ilə müqayisədə 2,9 milyon ABŞ dolları və yaxud 74,3 % çoxdur.

Eyni zamanda, 2021-ci ilin yanvar-may aylarında isə Azərbaycandan xarici ölkələrə 40,4 milyon ABŞ dolları dəyərində ilkin formalı polietilen ixrac olunub ki, bu da 2020-ci ilin eyni dövrü ilə müqayisədə 8,5 milyon ABŞ dolları və ya 26,6 % çoxdur.

Xatırladaq ki, Azərbaycanda polietilen və polipropilen "SOCAR Polymer" zavodunda istehsal edilir. “SOCAR Polymer" layihəsinə illik istehsal gücü 184 min ton olan Polipropilen zavodu və illik istehsalı 120 min ton təşkil edən Yüksəksıxlıqlı Polietilen zavodu daxildir. Polipropilen zavodunun açılışı 2018-ci il iyulun 18-də Azərbaycan Prezidenti İlham Əliyev və İtaliya Prezidenti Sercio Mattarellanın iştirakı ilə olub. Həmin ilin oktyabrın 5-dən isə polipropilenin ixracına başlanılıb.