“Bildiyiniz kimi, Şura 4 yayımçının lisenziyasına xitam verib. Bunlardan üçündə (Dalğa TV, ARB Ulduz TV, Mingəçevir TV) lisenziyaya xitam texniki xarakter daşıyırdı, belə ki, bu yayımçılar artıq xeyli müddətdir, özləri yayım aparmırdı”.

Valyuta.az xəbər verir ki, bunu Milli Televiziya və Radio Şurasının (MTRŞ) sədri İsmət Səttarov APA-ya müsahibəsində söyləyib.

Onun sözlərinə görə, “Lider” teleradio şirkətinə gəlincə, bu qərar məhkəmənin lisenziya sahibi olan şirkəti müflis elan etməsi əsasında “Televiziya və radio yayımı haqqında” qanunun 23.2.5-ci maddəsinə uyğun qəbul olunub: 

“Telekanalın böyük tarixini nəzərə alaraq bu, çox ağır bir qərar idi. Lakin başqa çıxış yolu yox idi. Hazırda maddi durumu çox ağır olub inkişaf edə bilməyən bir sıra teleradio yayımçıları var, lakin biz ümid edirik ki, onlar öz problemlərini həll edə biləcək. Hər hansı Azərbaycan kanalının bağlanması tamaşaçının seçim imkanlarını azaldır və ümumən televiziyanın durumuna mənfi təsir göstərir”.