Azərbaycan ilə İndoneziya arasında enerji əməkdaşlığına dair Anlaşma Memorandumu imzalanıb.  

Valyuta.az xəbər verir ki, Anlaşma Memorandumunu Azərbaycan energetika naziri Pərviz Şahbazov və İndoneziyanın energetika və mineral ehtiyatlar naziri Arifin Tasrif imzalayıblar.

Memoranduma əsasən, Azərbaycan və İndoneziya neft-qaz sektorunda hasilat və emal istiqamətləri, eləcə də bərpa olunan enerji sahəsi üzrə əməkdaşlıq edəcəklər. 

Sənəd, həmçinin  elmi və texniki əməkdaşlıq üzrə birgə layihələrin, təlim və inkişaf proqramlarının həyata keçirilməsini, enerji sahəsinə investisiyaların təşviqini, birgə seminar, konfrans və enerji forumlarının keçirilməsi istiqamətlərini əhatə edir. 

Anlaşma Memorandumundan irəli gələn məsələlərin müzakirəsi və həyata keçirilməsi məqsədilə Birgə İşçi Qrupunun yaradılması da nəzərdə tutulur.