Cari ildə Naxçıvan MR-da Sahibkarlığın İnkişafı Fonduna (NMR SİF) sahibkarlar və ailə təsərrüfatı subyektləri tərəfindən 77 müraciət daxil olub. 

MR-nın İqtisadiyyat Nazirliyindən Valyuta.az-a bildirilib ki, həmin müraciətlər üzrə monitorinqlər aparılıb, iqtisadi cəhətdən səmərəli hesab edilən müxtəlif təyinatlı prioritet layihələrlə bağlı sahibkarlıq subyektlərinə və ailə təsərrüfatlarına biznes- planların və digər zəruri sənədlərin hazırlanması istiqamətində köməkliklər göstərilib. 

Nəticədə, cari ilin 3 ayı ərzində fondun vəsaitləri hesabına müvəkkil kredit təşkilatı vasitəsilə 18 layihənin maliyyələşdirilməsinə 388 min 200 manatdan çox kredit verilib. Həmin vəsaitdən sənayeyönümlü 1 layihənin maliyyələşdirilməsinə 80 min manat yönəldilib. Həmçinin kənd təsərrüfatı məhsulları istehsalı, o cümlədən heyvandarlıq, arıçılıq, bağçılıq sahələrinin və soyuducu anbarın yaradılması, süd məhsullarının qablaşdırılması məqsədilə 17 layihənin maliyyələşdirilməsinə 308 min 200 manat vəsait sərf edilib.

Cari il ərzində NMR SİF tərəfindən arıçılıq, heyvandarlıq təsərrüfatlarının yaradılması və genişləndirilməsi məqsədilə 8 ailə təsərrüfatına 94 min 200 manat həcmində dövlət maliyyə dəstəyi göstərilib.