Milli Məclisin deputatı Afət Həsənova vaksin olunmuş şəxslərin metroya girişinin də sərbəst olması təklifi ilə çıxış edib. 

Valyuta.az-ın Trend.az-a istinadən verdiyi xəbərə görə, deputat bu gün Bakıda sərnişin sıxlığının aradan qaldırılması üçün metronun açılmasına ciddi ehtiyacın olduğunu diqqətə çatdırıb. 

Onun sözlərinə görə, lakin metroda yoluxmaya münbit şərait olduğu üçün hələki onun fəaliyyətini bərpa etmək olmur: 

"Düzdür bu gün Bakı Nəqliyyat Agentliyi kifayət qədər yaxşı işləyir. Lakin metronun işləməməsi istər-istəməz sıxlığın yaranmasına səbəb olur. Ancaq gələcəkdə yalnız vaksin olunmuş şəxslərin buraxılması şərtilə metronun fəaliyyətinin bərpa edilməsi mümkün ola bilər, yəni tam vaksinasiya olunmuş şəxslərin metrodan sərbəst şəkildə istifadə etməsi üçün şərait yaradıla bilər. Hesab edirəm ki, insanlar vaksinasiya prosesində aktiv iştirak etməli, vaksin olunanların sayı artmalıdır ki, bu cür qərarların qəbul edilməsi üçün şərait yaransın”.