Məlum olduğu kimi, avqustun 7-dən nəqliyyat vasitələrinin parklanmasına görə ödənişlərin yığımı yalnız nağdsız qaydada, mobil tətbiq və SMS-lər vasitəsilə həyata keçirilir. Yeni qanuna əsasən parklanma yerlərində “parkovşik”lərin dayanması qadağandır.

Valyuta.az xəbər verir ki, məsələ ilə bağlı Sfera.az-ın sorğusuna cavab olaraq Rabitə və Yüksək Texnologiyalar Nazirliyinin mətbuat xidmətinin əməkdaşı Pərvanə Əliyeva bildirib ki, parklanmaya görə sürücülərdən pul tələbi qanunsuzdur:

“Parklanma yerinin idarə edilməsi ilə bağlı qəbul edilən qaydalar həm tariflərin özünü, həm də şəhərin tarif zonalarını müəyyən edir. Parklanmaya olan tələbatdan asılı olaraq Bakı şəhərin müəyyən hissələri 4 ödənişli zonaya bölünüb.

Ödənişli küçə parklanma yerlərinin təşkili mərhələli qaydada həyata keçirilir. Mərkəz zonaya daxil olan ərazilərdə işlər artıq yekunlaşıb. Digər zonalar üzrə isə müvafiq infrastruktur işləri aparılır. Parklanma yerlərində yol nişanları və məlumat lövhələri quraşdırılır, nişanlanma xətləri çəkilir.

Hazırda Abbas Mirzə Şərifzadə küçəsində və infrastruktur təşkil edilməyən digər ərazilərdə parklanmaya görə sürücülərdən pul tələbi qanunsuzdur. Sürücülərə qanunsuz ödənişlər etməməyi tövsiyə edirik.

Parklanma yerlərinin yeni qaydalar əsasında idarə edilməsi bu sahədə nizam-intizamın yaradılmasına, qanunsuz pul yığımının qarşısını almaqla maliyyə şəffaflığının təmin olunmasına xidmət edir.

Qeyd edək ki, parklanmanın düzgün idarəedilməsi şəhər yollarında xaosun qarşısını alır və küçələrin daha effektiv, rahat və təhlükəsiz olmasına, həmçinin bütün növ nəqliyyat vasitəsi sahiblərinə şəhərin ərazisindən effektiv istifadə etməyə imkan yaradır. Eləcə də nəqliyyat axınının tənzimlənməsinə, şəhərin nəqliyyat infrastrukturuna, piyadaların və sürücülərin təhlükəsizliyinə, şəhərin əlçatanlığının və ümumilikdə dayanıqlı şəhər mobilliyinin inkişafına təkan verir”.