"Pullu yoldan istifadəyə görə ölkədaxili yükdaşımaların qiymətində müəyyən artım ola bilər".

Bunu Valyuta.az-a açıqlamasında iqtisadçı ekspert Natiq Cəfərli Bakı-Quba-Rusiya yolu üçün gediş qiymətlərinin müəyyənləşməsindən danışarkən deyib. 

O bildirib ki, bir çox ölkələrdə belə praktika mövcuddur, yəni pullu yolların olması təəccüblü deyil:

“Həmin ölkələrdə bu bir çox hallarda dövlətlə özəl sektorun iş birliyi ilə həyata keçirilir. İnvestisiyanın mənbəyi çox zaman özəl sektor olur. Özəl sektor vəsaiti qoyur, investisiya yatırır, sonradan pullu yollar vasitəsi ilə qoyduğu investisiyaları geri qaytarır. Və yaxud yolun istismarı zamanı cari təmir işlərini həmin vəsait hesabına həyata keçirir. Bu zaman da dövlət orqanları və yaxud da yerli bələdiyyələr ölkə miqyaslı orqanlarla birgə fəaliyyət göstərirlər”.

Natiq Cəfərli əlavə edib ki, vətəndaş olaraq bu vəsait ödənilib:

"Öz vergilərimizlə bu vəsaitin ödənilməsində, yolun çəkilişində iştirak etmişik. Yenidən vəsait ödənilməsi bir az problem yaradır. Əsasən də özəl avtomobillərin istifadəsi zamanı ödənişlərin olması problem yarada bilər. Hesab edirəm ki, kommersiya yükdaşımaları, avtobuslar, tırlar, beynəlxalq yükdaşımalar və s. bunlar həmin yoldan pullu istifadə etsələr daha məntiqli olar”.

Qeyd edək ki, Tarif Şurası Bakı-Quba-Rusiya yolu üçün gediş qiymətlərini müəyyənləşdirib. Ənənəvi yola alternativ olaraq yaradılmış Bakı-Quba-Rusiya Federasiyası ilə dövlət sərhədi avtomobil yolunun yeni hissəsi və bir sıra dərman vasitələri üçün tariflər müəyyənləşdirilib.

Aylin