Azərbaycanda son illər qanunsuz parklamalara qarşı müəyyən mübarizə aparılır. Amma hələ də bu istiqamətdə aparılan mübarizə tədbirləri tam effekt vermir. Paytaxt Bakıda sürücülər parklama qaydalarını pozmaqda davam edirlər. 

Nəqliyyat məsələləri üzrə ekspert Ərşad Hüseynov Valyuta.az-a açıqlamasında bildirib ki, qanunsuz parklamaya qarşı effektiv mübarizə üçün kompleks işlər görülməlidir:

“Qanunsuz parklamaya sürücülərin qanunsuzluğa yol vermələri, yol hərəkətinin təhlükəsizliyi, hərəkətin təşkili və ümumi yol nəqliyyat infrastrukturu ilə bağlı amillər səbəb olur. Yol nəqliyyat infrastrukturu normal olmalıdır ki, şəhərdə rahat şəkildə ictimai nəqliyyatdan, mikromobil vasitələrilə hərəkət etmək mümkün olsun. Bakıda hazırda ictimai nəqliyyat çatışmamazlığı var. Ona görə də insanlar əksər işlərini həll etmək üçün fərdi avtomobillərindən istifadə etməyə məcburdur. Belə vəziyyətdə isə şəhərin küçələrində hər bir avtomobilə saxlamaq üçün yer tapmaq mümkün deyil. 

Saxlamaların təşkili istiqamətidə atılan addımlar bütün əraziləri əhatə etsə, vəziyyət bir qədər yaxşılaşacaq. İnsanların yanaşma tərzindəki yanlışlıqlar da qanunsuz parklamaların baş alıb getməsinə şərait yaradır. Adətən sürücülər hansısa bir “X” nöqtəsinə gedirsə, çalışır ki, məhz elə onun düz yanında saxlasınlar. Halbuki ondan 200-300 metr kənarda da avtomobil saxlamaq üçün yer tapmaq olar. Ona görə də belə yanaşmanı dəyişməliyik. Nəhayət, qanunsuz parklamanın qarşısını almaq üçün güclü nəzarət olmalıdır”. 

Ramiz