Gömrük orqanlarında qeydiyyatı aparılmış, lakin gömrük rəsmiləşdirilməsi tam başa çatdırılmamış ixrac olunan xam neft və təbii qazın statistik qiymətləndirilmiş dəyəri nəzərə alınmaqla, 2021-ci ilin yanvar-iyun aylarında xarici ticarət dövriyyəsi 14 milyard 650,3 milyon ABŞ dolları, o cümlədən ixracın dəyəri 9 milyard 259,1 milyon dollar, idxalın dəyəri 5 milyard 391,2 milyon dollar təşkil edib.

Valyuta.az rəsmi mənbələrə istinadən xəbər verir ki, bunun nəticəsində 3 milyard 867,9 milyon dollarlıq müsbət ticarət saldosu yaranıb.

2020-ci ilin yanvar-iyun ayları ilə müqayisədə bu il xarici ticarət dövriyyəsi faktiki qiymətlərlə 24,7 faiz artıb, real ifadədə isə 7,7 faiz, o cümlədən idxal 11,1 faiz, ixrac 5,2 faiz azalıb. 

Dövlət Gömrük Komitəsindən daxil olmuş məlumatlara əsasən xarici ticarət dövriyyəsinin 87,6 faizi İtaliya, Türkiyə, Rusiya, Çin, Almaniya, Gürcüstan, Hindistan, Ukrayna, İspaniya, İsrail, Birləşmiş Krallıq, Portuqaliya, ABŞ, Xorvatiya, Tunis, İran, Belarus, İsveçrə, Tailand, Kanada və Fransa ilə aparılmış  ticarət əməliyyatlarının payına düşüb.

Qeyd edək ki, 2021-ci ilin yanvar-iyun aylarında Azərbaycanın hüquqi və fiziki şəxsləri tərəfindən dünyanın 171 ölkəsindəki tərəfdaşları ilə ticarət əməliyyatları həyata keçirilib, 100 ölkəyə məhsul ixrac olunub və 161 ölkədən idxal olunub.

Ölkəyə idxal olunmuş məhsulların ümumi dəyərinin 17,1 faizi Rusiyanın, 15,2 faizi Türkiyənin, 12,9 faizi Çinin, 6,3 faizi Almaniyanın, 4,3 faizi ABŞ-ın, 4,1 faizi Ukraynanın, 4,0 faizi İtaliyanın, 3,4 faizi İranın, 2,5 faizi Birləşmiş Krallığın, 2,1 faizi Yaponiyanın, 2,0 faizi Koreyanın, 1,7 faizi Fransanın, 1,6 faizi Braziliyanın, 1,5 faizi Hindistanın, hər biri 1,1 faiz olmaqla Belarus, Polşa və Vyetnamın, hər biri 0,9 faiz olmaqla Niderland və İsveçrənin, 16,2 faizi isə digər ölkələrin payına düşüb.

Ömər Vəzirli