Kriptovalyuta bazarında maraqla gözlənilən səsvermə gecə, Bakı vaxtı ilə saat 20:00-da başa çatıb. Valyuta.Az xəbər verir ki, nəticələrə görə, "Microsoft" səhmdarları şirkətin "Bitcoin"ə sərmayə qoymaq ilə bağlı təklifinə razılıq verməyiblər.

Gözləntilər də təklifin rədd edilməsi yönündə idi. Proqnoz bazarlarında təklifin qəbul edilmə ehtimalı cəmi 12 faiz olaraq göstərilirdi. Həmin təklif oktyabr ayında "Milli İctimai Siyasət Araşdırma Mərkəzi" adlı düşüncə mərkəzi tərəfindən təqdim edilmişdi. Mərkəz, "Microsoft"un inflyasiyadan qorunmaq üçün ümumi aktivlərinin 1%-ni "Bitcoin"ə ayırmalı olduğunu təklif etmişdi.

Digər tərəfdən, "Microsoft"un idarə heyəti isə bu təklifin əleyhinə səs verilməsini tövsiyə etmişdi.

Təxminən 80 milyard dollar nağd vəsaitə malik olan texnologiya nəhənginin "Bitcoin"ə sərmayə qoyması üçün "MicroStrategy"nin idarə heyəti sədri Maykl Saylor (Michael Saylor) da təşəbbüs göstərmişdi. Saylor, "Microsoft"un idarə heyətinə üç dəqiqəlik təqdimat keçirmiş və şirkətin tamamilə Bitcoin strategiyasına keçməsinin ona trilyonlarla dollar qazandıracağını iddia etmişdi.

"Microsoft"un idarə heyətində kriptovalyutalara yaxın şəxslər olsa da, onların sayı kifayət qədər deyil. Belə şəxslərdən biri "LinkedIn"in qurucusu və Bitcoin haqqında müsbət fikirləri ilə tanınan Reyd Hoffman (Reid Hoffman) idi.

"Microsoft"un qurucusu və iri səhmdarlarından biri olan Bill Qeyts (Bill Gates) isə Bitcoin-ə qarşı mövqeyi ilə tanınır. Qeyts 2021-ci ildə verdiyi açıqlamada Bitcoin üçün sərf olunan enerjinin ətraf mühiti mənfi təsirləndirdiyini bildirmişdi.

Səhmdarların qərarı Bitcoin-in qiymətində düşüşə səbəb olub. Ən populyar kriptovalyuta qərardan sonra 94 600 dollar səviyyələrinə qədər geriləyib.

Aydın