Əyləncə məqsədilə yaradılan və "meme-koinlər" adlandırılan kriptovalyutalar son vaxtlar qiymətlərində kəskin artımlarla investorların diqqətini cəlb edir. Bu növ aktivlərə treyderlər və iri hedc-fondlar tərəfindən milyardlarla dollar yatırılır. 

Valyuta.Az xəbər verir ki, "Financial Times" ("FT") nəşrinin məlumatına görə, bu yeni tendensiyanın ən diqqətçəkən nümunəsi, artıq ölmüş ev dələsinin şərəfinə adlandırılmış "Peanut" ("PNUT") adlı kriptovalyutadır.

Peanut dələsinin tarixi və "PNUT"un yaranması 

Peanut dələsi 2017-ci ildə amerikalı həvəskarlar Mark və Daniella Lonqo tərəfindən xilas edilərək evdə saxlanılmışdır. Onlar dələ üçün sosial şəbəkələrdə hesablar yaratmış və bu hesablar geniş populyarlıq qazanmışdır. Bu internet fenomeni şərəfinə "PNUT" adlı kriptovalyuta yaradılmış və bazara çıxarılmışdır. 

2024-cü il 30 oktyabr tarixində "Nyu-York ştatının Ətraf Mühitin Mühafizəsi Departamenti" ("NYSDEC") dələni Lonqo ailəsindən alaraq, quduzluq şübhəsi ilə onu yuxuya vermişdir. Lakin dələnin ölümündən sonra məlum olmuşdur ki, bu şübhələr əsassızdır. Bu hadisə sosial şəbəkələrdə hakimiyyətin qərarlarına qarşı geniş narazılıq dalğası yaratmış, hətta milyarder Elon Mask da bu narazılığı dəstəkləmişdir.

"PNUT"un meteorit artışı

Dələnin ölümü ətrafında yaranmış müzakirələr nəticəsində "PNUT" kriptovalyutasının qiyməti bir neçə gün ərzində 0,1 dollardan 2,27 dollara qədər artmış və ümumi kapitalizasiyası 2 milyard dolları ötmüşdür. Bununla da "PNUT" hətta Elon Maskın dəstəklədiyi "Dogecoin" ("DOGE") kriptovalyutasını belə geridə qoyaraq tarixin ən sürətli inkişaf edən "meme-koini" olmuşdur.

Digər kriptovalyutaların artımı və bazardakı dəyişikliklər

ABŞ prezidenti seçilən Donald Trampın kriptovalyuta icmasını dəstəkləyəcəyini vəd etməsi digər "meme-koinlər"in də kəskin artımına səbəb olmuşdur. Bu kriptovalyutalar arasında "MOO DENG", "888", "POPCAT", "dogwifhat" və "CHILLGUY" xüsusi diqqət çəkir.

Bu həftə isə "Bitcoin" ilk dəfə olaraq tarixdə 100 min dollar səviyyəsini keçmişdir. Bu hadisə kriptovalyuta bazarına müdaxilə etməməyi dəstəkləyən Pol Atkinsonun ABŞ Qiymətli Kağızlar və Birjalar Komissiyasının ("SEC") rəhbəri təyin olunması ilə əlaqələndirilir.

Rəhim