"Wall Street" iqtisadçıları, bu gün ABŞ-də açıqlanan qeyri-kənd təsərrüfatı məşğulluq göstəricilərindən sonra ABŞ Mərkəzi Bankının ("Fed") faiz dərəcələrini endirmək qərarı ilə bağlı proqnozlarını yenidən qiymətləndirirlər.

Valyuta.Az xəbər verir ki, "JPMorgan" analitikləri bu il 75 baza bəndi həcmində faiz endirimi gözləntilərini dəyişməsə də, prosesin başlanğıcını mart ayından iyun ayına qədər uzadır. "JPMorgan" analitikləri qeyd edirlər ki, "Komitənin mart ayına qədər faiz endirimi etməsi üçün çox pis məşğulluq hesabatlarının təqdim olunması lazımdır."

"Morgan Stanley" iqtisadçıları isə yeni göstəricilərdən sonra qısa müddət ərzində "Fed"in faiz endirimləri ehtimalının azaldığını vurğulayırlar. Bununla yanaşı, iqtisadçılar mart ayında inflyasiyanın "daha uyğun" görünüşü səbəbindən faiz endiriminin mümkün olduğunu bildirirlər. "Morgan Stanley", 50 baza bəndi həcmində faiz endirimi gözləntilərini qoruyur və bunun iyun ayına qədər həyata keçiriləcəyini proqnozlaşdırır.

"Barclays" analitikləri bu il 50 baza bəndi həcmində faiz endirimi olacağını və ilin sonunda faizlərin 3,75-4,00% səviyyəsinə düşəcəyini proqnozlaşdırırlar.

"Nomura" və "Macquarie" isə bu il üçün yalnız 25 baza bəndi həcmində faiz endirimi olacağını gözləyirlər.

"Wells Fargo" analitikləri isə bugünkü göstəricilərdən sonra mart ayında faiz endirimi ehtimalının daha az mümkün olduğunu bildirirlər.

Heç bir maliyyə qurumu "Fed"in yanvar ayında keçiriləcək iclasında faiz dərəcələrində dəyişiklik olacağını gözləmir.

"Fed"in 2025-ci ildəki ilk faiz qərarı 29 yanvar tarixində elan ediləcək.

Rəhim