Həyət evləri və binalardan mənzil alarkən mütləq birinci növbədə, həmin əmlakın dövlət reyestrindən çıxarışının olub-olmamasına diqqət etmək lazımdır".

Valyuta.az xəbər verir ki, bu sözləri İqtisadiyyat.az-a açıqlamasında əmlak məsələləri üzrə ekspert Ramil Qasımzadə deyib.

O, hazırda xüsusən də Bakıda satılan bir çox həyət evlərinin sənədsiz olduğunu xatırladıb. Ekspert gələcəkdə hər hansı bir problemlə üzləşməmək üçün ilk növbədə daşınmaz əmlakın dövlət reyestri xidmətindən əmlakın çıxarışının olub-olmamasını yoxlamağın vacibliyini vurğulayıb:

"Lakin çıxarışın olması sənədlərin tam qaydasında olması demək deyil. İkinci növbədə, vətəndaş torpaq sahəsinin təyinatına diqqət etməlidir. Torpağın təyinatı yaşayış məntəqələrinin torpaqları olmalıdır. Bütün bunlar çıxarışda öz əksini tapmalıdır. Əgər belədirsə və torpaqla yanaşı fərdi yaşayış evi də eyni çıxarışda əks olunubsa, artıq bu sənəd vasitəsilə notariat qaydada alqı-satqı etmək olar. Notariatda alqı-satqı edən zaman vətəndaş bilməlidir ki, torpaq sahəsinə və fərdi yaşayış evinə görə vergi müəyyən olunub. Fərdi yaşayış evinin 30 kvadratdan artıq hissəsinə görə vergi rüsumu müəyyən edilmişdir. Bu vergi satıcı tərəfindən ödənməlidir".

O, bəzən insanların həyət evləri alarkən bələdiyyə sənədləri vasitəsi ilə aldadıldığını söyləyib və vətəndaşları birmənalı şəkildə belə sənədlərə aldanmamağa çağırıb:

"Birmənalı olaraq bilmək lazımdır ki, fərdi yaşayış evinin alqı-satqısı üçün əsas sənəd dövlət reyestri tərəfindən verilən çıxarışdır. Hər hansı bir fərdi yaşayış evini almazdan öncə əvvəlcədən baxış keçirmək, oranın kommunikasiya və kommunal xətlərinin mövcudluğuna diqqət etmək vacibdir. Evi aldıqdan sonra suya, elektrikə və digər kommunal borcun olması ortaya çıxa bilər. Belə hallarla qarşılaşmamaq üçün satıcıdan borcun olub-olmaması ilə bağlı arayışın tələb olunması lazımdır. Bundan əlavə, hər bir fərdi yaşayış evinin hündürlüyünə mütənasib olaraq onun 0,3 əmsalında ara məsafəsi olmalıdır. Məsələn, 6 metr hündürlüyü olan evin qonşu evdən məsafəsi ən azı 2 metr olmalıdır".