Qazaxıstanın əsas neft kəməri üzrə milli operatoru "KazTransOil" 2024-cü ilin ilk 11 ayında "Bakı-Tbilisi-Ceyhan" boru kəməri ilə nəql etdiyi neft həcmini 1,3 milyon tona çatdırıb. 

Valyuta.Az xəbər verir ki, bu barədə şirkətin mətbuat xidmətinin açıqlamasında qeyd olunub:  

"2024-cü ilin yanvar-noyabr aylarında "KazTransOil" ASC "Aktau" dəniz limanı vasitəsilə "Bakı-Tbilisi-Ceyhan" boru kəməri ilə 1 milyon 342 min ton Qazaxıstan nefti nəql edib. Müqayisə üçün, 2023-cü ilin eyni dövründə bu marşrut üzrə nəql edilən neftin həcmi 910 min ton olub.  

2024-cü ilin dekabr ayında Qazaxıstan neftinin "Bakı-Tbilisi-Ceyhan" boru kəməri vasitəsilə nəqli Qazaxıstan Respublikası Energetika Nazirliyinin təsdiq etdiyi neft nəqli qrafikinə əsasən, göndəricilərin sifarişləri əsasında həyata keçiriləcək. Sözügedən qrafikə görə, dekabr ayında "Aktau" limanından 122 min ton neftin daşınması planlaşdırılır."

Energetika nazirliyinin təqdim etdiyi məlumata görə, Qazaxıstan bu il ümumilikdə 68,8 milyon ton neft ixrac etməyi planlaşdırır. Müqayisə üçün, 2023-cü ildə ölkə 70,5 milyon ton neft ixrac edib, ümumi neft istehsalı isə 90 milyon tona çatıb. Qazaxıstan hakimiyyəti 2030-cu ilə qədər istehsalı 100 milyon tona çatdırmağı hədəfləyir.  

Rəhim