"Ukrayna müharibəsi başlayandan sonra Rusiya sanksiyalarla üzləşib və artıq Avropanın mavi yanacaqla təchizatında Azərbaycan əhəmiyyətli və sabit tərəfdaş kimi öz mövqeyini təsdiq edib. Buna görə də son iki ildə ölkəmizin Şərqi və Mərkəzi Avropa üçün önəmi artıb”.

Bu haqda Valyuta.az-a İqtisadi Sosial Araşdırmalar Yardım İctimai Birliyinin sədri Eyyub Kərimli Azərbaycanın Macarıstana qaz tədarükünün 1 milyard kubmetrə çatdırmasının iqtisadi faydaları haqqında danışarkən deyib.

İqtisadçı deyib ki, 2025-ci ilə qədər Azərbaycanın qaz ixracı 25 milyard kubmetrə çatmalıdır və əsasən də Macarıstana 2 milyard kubmetr qaz idxal etmək niyyətindədir:

“Həmçinin Bolqarıstan, Yunanıstan interkonnektoru işə düşəndən sonra imkanları daha da genişlənir və artıq həmin interkonnektor vasitəsilə 5 milyard kubmetr qaz ixrac etmək imkanları nəzərdə tutulub” .

Eyyub Kərimlinin sözlərinə görə, hazırda Macarıstanla ölkəmiz arasında ticarət dövriyyəsi 47 milyona çatıb və bu, ötən illə müqayisədə 26 faiz çoxdur:

“Bu da əsasən qeyri-neft sektoru məhsullarının idxal-ixracı ilə bağlıdır, Macarıstanla Azərbaycan arasında geniş və perspektivli qeyri-neft sektoruna aid idxal-ixrac imkanları var. Belə ki, Macarıstandan Azərbaycana kənd təsərrüfatı, ərzaq məhsulları idxal edilməsi mümkündür.
Hazırda Rumıniya və Macarıstanla Azərbaycan arasında digər sazişlər var və Qara dənizin dibi ilə dünyanın ən uzun elektrik enerjisi kabeli çəkilməsi də nəzərdə tutulur. Bu kabelin uzunluğu 1195 kmdir. Bu, Macarıstanla Azərbaycan arasında iqtisadi əlaqələri daha da genişləndirəcək və möhkəmləndirəcək”.

"Bu müqavilə Azərbaycan iqtisadiyyatına necə təsir edəcək" sualına cavab olaraq iqtisadçı bildirib ki, iqtisadiyyatımız daha da möhkəmlənir:

“Ölkəmizin büdcə gəlirləri, valyutanın daxil olması artır. Hazırda neft hasilatında azalma müşahidə olunursa, qaz hasilatında daha da artım müşahidə olunur və bu da bizim gələcək iqtisadi inkişafımızı təmin edir”.

Bu mqavilənin Azərbaycanın Avropadakı siyasi mövqeyinə təsiri haqqında da danışan Eyyub Kərimli qeyd edib ki, bu gün Azərbaycan tək Macarıstanla yox, həmçinin Sloveniya, Slovakiya, Serbiya, Rumıniya və Bolqarıstanla da iqtisadi əlaqələrini genişləndirir:
 
“Azərbaycan 10-a yaxın Avropa ölkəsi ilə artıq təmasdadır və gələcəkdə qaz ixrac etmək imkanları əldə edib. Bu, ölkəmizin gələcək perspektivlərini daha da genişləndirir. Azərbaycanın Avropa ilə əməkdaşlığını daha təkmil və daha sabit bir müstəviyə çıxardır. Bu, həm də ölkəmizin siyasi mövqeyində möhkəmlənməsinə öz təsirlərini göstərir”.

Davud