Qlobal valyuta bazarında dolların məzənnəsinin möhkəmlənməsi müşahidə olunmaqdadır. 

Valyuta.Az xəbər verir ki, bu barədə millət vəkili Vüqar Bayramov açıqlama verib. Onun sözlərinə görə, avro da dollara nisbətən dəyər itirməkdədir. Bir müddət əvvəl 1 avro almaq üçün 1.20 dollar ödəmək lazım idisə indi məzənnə 1.18-dək azalıb. 

“Bugünki birja nəticələrində dollar, demək olar, bütün səbət valyutalara nisbətən möhkəmlənib. Türkiyə lirəsindən sonra şimal qonşumuzda da milli valyuta dollar qarşısında dəyərsizləşib. Belə ki, 1 həftə öncə 1 dollar üçün 72 rubl ödəmək lazım idisə, indi bu rəqəm 76 rubladək dəyişib”. 

V.Bayramov vurğulayıb ki, dolların səbət valyutalara nisbətən dəyər qazanması Amerika Birləşmiş Ştatlarında yeni fiskal stimullaşdırma paketi hazırlaması və Federal Ehtiyatlar Sisteminin (FES) monetar siyasəti normallaşdırmaq cəhdləri ilə bağlıdır: 

“Bu arada Fitch agentliyi ABŞ üçün 2021-ci ildə iqtisadi artım proqnozunu 4,5 faizdən 6,2 faizədək yüksəldib. Bununla yanaşı, bir sıra ölkələrdə o cümlədən Rusiya və Türkiyədə milli valyutaların ABŞ puluna nisbətən ucuzlaşmasının yerli spesifik səbəbləri də var”.

Azərbaycana gəlincə, millət vəkili bildirib ki, valyuta bazarında Mərkəzi Bankın intervensiyası hələ də həlledici olaraq qalmaqdadır. Bu baxımdan, qlobal valyuta bazarındakı dəyişikliklər fonunda manatın məzənnəsinin necə dəyişməsi yenə də Mərkəzi Bankın mövqeyindən asılı olacaq.