Son dövrlər baş verən xəstə ölümlərindən sonra insanlar müxtəlif fikirlər səsləndirir. Qeyd edirlər ki, bir neçə il əvvəllə qədər xəstələr əməliyyatdan sonra ən azı xəstəxanada 3 gün qalırdı. Bu, onların xəstəliyinin ağırlıq dərəcəsinə görə dəyişirdi. 

Ancaq indi xəstə əməliyyat olundu, axşam və ya səhərə evə yazılır. Bu da onların nəzarətsiz qalmasına səbəb olur. Halbuki xəstə həkim nəzarətində olmalıdır. Xüsusi ilə özəl xəstəxanalar bunu edirlər.

Bəs əməliyyatdan sonrakı proseslərlə bağlı protokol qaydası necədir? 

Valyuta.az mövzunu professor Adil Qeybulla ilə müzakirə edib. Professor qeyd edib ki, bu müddət keçirilən əməliyyata bağlı olaraq, bir gün də, üç gün də ola bilər:

"Bütün bunlar hamısı fərdidir. Ona görə də müxtəlif rəylər ola bilər. Yəni, standart bir qrafik, protokol yoxdur".

Adil Qeybullanın sözlərinə görə, xəstə xəstəxanadan o halda evə yazılır ki, özünü tamamilə normal hiss edir, həyatına heç bir təhlükə yoxdur:

"Bəzən xəstəni ambulator müalicə üçün də evə göndərə bilirlər. Amma istənilən halda bu o vaxt olmalıdır ki, xəstənin stasionar müalicəyə ehtiyacı olmasın. Bunu isə həkim müəyyənləşdirir. Ümumiyyətlə, xəstələrin cərrahi əməliyyata mərzu qalması və daha sonra onlara qulluğun həyata keçirilməsi konkret olaraq xəstənin vəziyyətinə bağlıdır".

Son dövrlər estetik əməliyyatlardan sonra artan ölüm halları haqqında danışan Adil Qeybulla bildirib ki, bu əməliyyatlardan sonra xəstə kifayət qədər maye itirdiyindən, mübadilə pozuntusu baş verdiyinə görə əlavə müalicəyə ehtiyac duyulur:

"Estetik əməliyyatlardan, liposaksiya, abdominoplastika əməliyyatlarından sonra xəstələr evə göndərilir, müalicə  ambulator şəraitdə həyata keçirilmir, xəstələrdə dehidrotasiya başlayır. Bundan isə ölüm halları baş verir. Düşünürəm ki, bütün baş verən problemlərlə bağlı olan məsələlər qaydaya salınmalıdır. Bunun üçün də ilk növbədə kritik protokollar işlənməlidir. Digər məsələləri isə bu protokolun əsasında yoxlamaq və qaydaya salmaq mümkündür".

Davud