Dünyada yarım milyarddan çox insan bu gün kriptovalyuta sahibidir. Yatırım vasitəsi kimi kriptovalyutanı seçənlərin sayı günü-gündən artır. Ölkəmizdə də bu sahəyə yatırım edənlərin, maraq göstərənlərin sayı artmaqdadır. Son zamanlar kriptovalyuta birjalarına kiberhücumlar olması bəzən insanlarda narahatlıq yaradır. Ümumiyyətlə, kriptovalyuta birjası yatırım etmək üçün nə qədər təhlükəsizdir? Yatırım edən şəxslər təhlükəsizlik üçün hansı birjanı seçməlidir?

Valyuta.az-a danışan investisiya üzrə mütəxəssis Rövşən Hüseynov deyir ki, kriptovalyuta birjalarının güvənli olması onların istifadəçilərin çoxluğuna və gizlilik sisteminə görə nəzərə alınır:

“Gizlilik sistemi burada olan koinlərin və blokçeyn şəbəkələrinin daha çox istifadə olunmasına görə olur. Bunların daha çox istifadə olunması blokçeyn şəbəkəsini daha güvənli edir. Amma yenə də hər bir kriptovalyuta birjasında müəyyən qədər risk var. Bu riskləri gözə almaqdansa, soyuq cüzdanlardan istifadə edə bilərlər. Çünki bunun ən güvənli yolu budur. Bu zaman onların kiberhücumlara məruz qalması halları olmur. Birjalarda ümumi olaraq risklər olur, amma elə birjalardan istifadə etmək lazımdır ki, onların güvənliliyi və təhlükəsizlik sistemi daha yaxşı olsun. Məsələn, “Coinbase” və “Binance” kimi platformalardan kriptovalyuta almaq daha təhlükəsiz olar. Bu birjalar ən güclülərdir və gizlilik sistemləri güclüdür”.

Əvəz Həsənov