![](https://valyuta.az/file/articles/2024/07/16/1721119913_9115c750-0597-36d1-9aae-1ca01484554b_850.jpg)
Ekspert: "Polietilen torbaların istehsalının artması onun istifadəsinin çoxalması demək deyil"
Bu ilin ilk yarısında Azərbaycanda 10 min 392,6 ton polietilen kisə və çantalar, 2 184,2 ton plastmas kisə və çantalar istehsal edilib. Ötən ilin eyni dövrü ilə müqayisədə polietilen kisə və çantaların istehsalı 49,4%, plastmas kisə və çantaların istehsalı isə 3,5 dəfə artıb.
Ötən ilin 15 fevral tarixindən etibarən Bakıda fəaliyyət göstərən aparıcı supermarketlərdə polietilen torbalara görə alıcılardan ödəniş tələb olunur. Açıqlanan rəsmi məlumatlar göstərir ki, polietilen torbaların ödənişli olmasından sonra bu məhsulun istehsalı kəskin şəkildə artıb.
Bəs polietilen torbalar ödənişli olduqdan sonra da istehsalının artmasının səbəbi nədir?
Valyuta.az-a danışan iqtisadçı ekspert Xalid Kərimli deyir ki, burada bir neçə məqam var. İstifadə və istehsal həcminə baxmaq lazımdır:
“Ola bilsin ki, polietilen torbalar əvvəl daha çox idxal olunurdu, indi isə idxal əvəzinə yerli istehsal artıb. Hər hansı istehsalın artması istehlak həcminin çoxalması demək deyil. Çünki bizim istehlak etdiyimiz məhsulların mənbələri fərqli olar bilər. Xarici ölkələrdən idxal olunan mallar hesabına istehlak arta bilər”.
Ekspert bildirdi ki, həm də polietilen torbaların tərkibində mikronların sayının çox olanları ekologiyaya ziyan vurur. Buna görə də, tərkibində mikronların həcmi yuxarı olan torbalar ödənişli olub:
“Şəffaf, adətən meyvə-tərəvəz satılan bölmələrdə olan torbalar pulsuzdur. Sadəcə olaraq təbiətə ziyan vuran və torpağa qarışması mümkün olmayan torbalar ödənişlidir. İkinci məqam da ondan ibarətdir ki, əvvəllər vətəndaşlar marketlərdən torbaları pulsuz alsa da, marketlər həmin torbaları almaq üçün topdançılara ödəniş edirdi. Bu torbaların istehlakı hər zaman pullu olub”.
Əvəz Həsənov
Mətndə səhv varsa, onu qeyd edib ctrl + enter düyməsini basaraq bizə göndərin.
Son xəbərlər
Ən çox oxunanlar
- Bu gün
- Bu həftə
- Bu ay