Sosial şəbəkədə iş müsahibəsinə gedən qadına onun görünüşünün müsahibədən keçdiyi vəzifənin mövqeyinə uyğun olmadığını bildirərək işə götürülməməsi haqqında məlumat yayılıb.

İşə götürən şəxs qadının makiyaj etmədiyini bildirib. Müshaibəyə makiyajsız, baxımsız gəlməsi işə qəbul olmasına maneə olması kimi qeyd edilib. Bu məlumat Azərbaycanda deyil, başqa bir ölkədən qarşımıza çıxan nümunədir. Maraqlıdır, Azərbaycanda iş müsahibəsinə gedən zaman səliqəli görünüşün işə qəbulda rolu nə qədərdir? İşə müraciət edən şəxsin görünüşünün vəzifənin mövqeyinə təsiri var?

Bu barədə Valyuta.az-a danışan HR Hunter şirkətinin qurucusu, İnsan Resursları üzrə konsultant İlkin Mirzəzadə bildirib ki, o, iş görüşməsi zamanı müsahibin səliqəli olmasına, dürüstlüyünə fikir verir. Aşırı makiyaj və ya digərləri ən son fikir verilən nüanslar olsa da, bu, vəzifə kateqoriyasına görə dəyişə bilər:

“Arxa və ön ofisdə işləyən işçilər var. Ön ofisdə çalışanlar, yəni müştərilərlə ünsiyyətdə olanları müştərilər görür. Buna görə də, müştərilərin də baxımlı, səliqəli şəxslər görmək istəməsi normaldır. Bu xüsusiyyət bütün şirkətlərdə tələbdir. Bu, vəzifə kateqoriyalarına görə dəyişə bilər. İT mütəxəssisləri, HR-lar və digər arxa ofisdə çalışan əməkdaşlar var ki, onlarda baxılan əsas məsələ səliqəli olmalarıdır. Ön ofisdə çalışan şəxslərin isə səliqəli olması ilə yanaşı, daha yaxşı görünməsinə də önəm verilir. Ümumilikdə bu, şirkətin öz siyasətidir.

Necə əməkdaşlar seçməsi şirkət tərəfindən müəyyən olunur. Hər şirkətin qaydası var və buna əsasən hərəkət edir. Əsas odur ki, dini, irqi, dili ayrı seçkiliklər olmasın, amma görünüş baxımından qanunvericilikdə hər hansı müddəa yoxdur”.

Əvəz Həsənov