Milli Məclisin deputatı Fəzail Ağamalı paytaxtdakı sıxlığın qarşısını almaq üçün Sumqayıtla Bakı arasında metro xəttinin çəkilməsini və Sumqayıt tərəfdən gələn avtomobillərin paytaxta buraxılmamasını təklif edib. 

Qeyd edək ki, əvvəllər də bölgələrdən gələn maşınların Bakıya buraxılmaması təklifləri səslənib. Lakin hələlik bu təkliflər elə təklif olaraq qalır. 

Görəsən, Sumqayıtdan Bakıya gələn avtomobillərin paytaxta buraxılmaması mümkündürmü? 

Mövzu ilə bağlı Valyuta.az-a açıqlamasında nəqliyyat məsələləri üzrə ekspert Elməddin Muradlı deputatın Sumqayıtdan gələn maşınlarla bağlı təklifini ümumən dəstəkləyərək, Avtovağzal ərazisindəki parklanma yerinin onların sərəncamına verilməsini mümkün hesab etdi:

“Bölgələrdən paytaxta gələn maşınların Bakıya buraxılmaması təkliflərini alternativlər yaratmadan həll etmək mümkün deyil. Sumqayıtdan Bakıya gələn maşınlar barədə danışsaq, Avtovağzal ərazisində təxminən 2 minə yaxın nəqliyyat vasitəsinin parklanması üçün yer var. Sumqayıtdan gələn maşınları məhz Avtovağzal ərazisinə yönləndirmək olar. Nəticədə Avrovağzalda böyük canlanma baş verəcək, orada ticarət inkişaf edəcək. Lakin əsas məsələ avtomobillərini həmin əraziyə yönəldəcək insanlar üçün parklanmanın neçəyə başa gələcəyidir. 

Amma cənub istiqamətdən paytaxta girişdə gələn avtomobillərin parklanması üçün lazımi sistem qurulmayıb. Ona görə də bu məsələ ilk növbədə təhlil olunmalı, araşdırılmalı, sonradan onun icrası mexanizmi üzərində düşünmək olar. Yəni əvvəl şərait yaradılmalıdır ki, sonra tələb edə biləsən”.

Ramiz