Övladlar tərəfindən valideynlərə ödənilməli olan aliment necə müəyyən olunur? 

Valyuta.az bu barədə Vəkillər Kollegiyasının üzvü, vəkil Qumru Eyvazovanın şərhini təqdim edir:

“Ailə Məcəlləsinin 82-ci maddəsinə əsasən, əmək qabiliyyəti olan yetkinlik yaşına çatmış övladlar maddi yardıma ehtiyacı olan əmək qabiliyyəti olmayan valideynlərini saxlamağa və onlara qayğı göstərməyə borcludurlar. Aliment övladlardan yalnız məhkəmə qaydasında tutulur. 

Övladların hər birindən tutulan alimentin həcmi məhkəmə tərəfindən valideynlərin və övladların maddi və ailə vəziyyətə nəzərə alınmaqla hər ay ödənilməli olan sabit pul məbləği ilə müəyyən edilir. Alimentin miqdarı müəyyən olunarkən – baxmayaraq ki, tələb valideyn tərəfindən yalnız bir övlada qarşı irəli sürülüb - məhkəmə övladların hamısını nəzərə almağa haqlıdır. 

Valideynlərin öz valideynlik vəzifələrini yerinə yetirməməsi məhkəmə tərəfindən müəyyən olunarsa, övladlar valideynləri saxlamaq vəzifəsindən azad edilə bilərlər”.

Əvəz Həsənov