"Elektron Hökumət Portalı ilə bağlı məsələ aktual problemdir. Portal artıq yaradılıb, bir çox hallarda da fəaliyyət göstərir. Müəyyən arayışların alınması üçün hansısa idarəyə də getməyə ehtiyac qalmayıb. Bəzi işlər görülüb, amma yetərli deyil, layihənin inkişaf etdirilməsinə ehtiyac var". 

Bunu Valyuta.az-a açıqlamasında iqtisadçı ekspert Natiq Cəfərli Elektron Hökumət Portalının fəaliyyətindən danışarkən deyib.

Elektron Hökumət Portalı fəaliyyət göstərsə də, tam gücü ilə işləyə bilmir. Bu da insanların dövlət qurumlarına müraciət edərkən problemlərlə üzləşməsinə, arayış və digər sənədləri alarkən əlavə vaxt itkisinə səbəb olur.

Natiq Cəfərli bildirib ki, portalda müəyyən problemlər mövcuddur və bunlar aradan qaldırılmalıdır. Əsasən də, inteqrasiya məsələsi həll olunmalıdır ki, vətəndaşın vaxt itkisinə yol verməsinin qarşısı alınsın:

"Onun tamamilə işlək vəziyyətə salınması və bütün məlumat bazasının vahid mərkəzdə inteqrasiya edilib, daha asan hala gətirlməsi ilə bağlı hələ problemlər mövcuddur. Düşünürəm ki, bununla məşğul olan orqanlar öz fəaliyyətlərini genişləndirməlidirlər. Çünki bu o qədər də çətin prosedur deyil, çox asanlıqla həll edilməli məsələdir. Hansısa texniki məlumat bazalarının toplanması və bölünməsi qaydalarında dəyişiklik edilməsinə ehtiyac var ki, bir çox hallarda belə məsələlər elektron qaydada öz həllini tasın. Müxtəlif qurumların artıq elektron məlumat bazaları mövcuddur. Sadəcə onları inteqrasiya etmək lazımdır ki, bir-birini görə, əlaqəli vəziyyətdə fəaliyyət göstərə bilsinlər. Bütün sadaladığım bu məsələlər həllini tapsa, vətəndaşların zaman israfına ehtiyac qalmayacaq. Nəticədə bu proseslər vətəndaşların işini asanlaşdıracaq".

Davud