Xarici valyutada verilən kreditlərin kəskin artmasının səbəbi nədir?
Yanvarda Azərbaycanda xarici valyutada verilən kreditlər kəskin artıb. Belə ki, yanvarda keçən ilin dekabrına nisbətən Azərbaycan banklarının xarici valyutada cəmi kredit portfeli 315,2 milyon manat artaraq, 4,682 milyard manat olub. 2024-cü ilin yanvarında bankların cəmi kredit portfelindəki artımın 82 faizi xarici valyutada verilən kreditlərlə bağlı olub.
Mövzu ilə bağlı Valyuta.az-a açıqlamasında iqtisadçı ekspert Xalid Kərimli bildirir ki, ilin ilk ayında bankların kredit portfelindəki artımın 82 faizinin xarici valyutalı kreditlərlə bağlı olması ölkəmizdəki sürətli iqtisadi artım, COP-29 ərəfəsində dövlət xərcləri, investisiya alışının artması ilə bağlıdır:
“Hazırda Azərbaycanda istehlak kreditlərinin dollarla verilməsi məhdudlaşdırılıb. Banklar valyuta gəlirlərinin olmadığına əmin olsa, hətta hüquqi şəxslərə də valyuta ilə kredit verməz. Bu istiqamətdə Mərkəzi Bank vəziyyəti qəlizləşdirib. İstehlakçı, fiziki şəxslərin valyuta gəliri yoxdursa, onlara valyuta krediti verilmir. Hüquqi şəxslərlə bağlı da həmin məsələdə həddən artıq ehtiyatlı yanaşırlar. O baxımdan xarici valyuta üzrə kredit portfelinin artmasının Azərbaycan iqtisadiyyatı və sahibkarlıq fəaliyyəti üçün hər hansı bir problemi yoxdur.
Digər tərəfdən, yanvar ayında ölkədə iqtisadi artım gözlənilmədiyi şəkildə sürətlə artıb. Hətta qeyri-neft sektorunda artım 12 faiz civarında olub. Onun baş verməsində verilmiş kreditlərin də rolu vardır. COP-29 ərəfəsində dövlət xərcləri, investisiya alışı artır. Nəticədə valyuta gəliri olan şəxslərə xarici valyuta kreditinin verilməsi prosesi daha sürətli xarakter alır”.
Ramiz
Mətndə səhv varsa, onu qeyd edib ctrl + enter düyməsini basaraq bizə göndərin.
Son xəbərlər
Ən çox oxunanlar
- Bu gün
- Bu həftə
- Bu ay