“Bəzi restoranlar məhsulun üzərinə 100 faizdən də çox pul qoyurlar”
Bəzi restoranlarda qiymətlər həddindən artıq baha qoyulur. Məsələn, 20 manatlıq məhsulu 60 manata, 5 manatlıq məhsulu 25 manata və s. kimi hallar olur. Müştərilər marketlərdə satılan hər hansı bir məhsulun restoranlarda çox daha baha olduğunu qeyd edirlər. Bəs restoranların qiymətlərini tənzimləyən hər hansı sistem var, yoxsa restoran hansı qiymətə istəsə məhsulu sata bilər?
Bu barədə Valyuta.az danışan restorator Mahir Əhmədzadə qeyd edib ki, azad biznes, azad iqtisadiyyat, azad bazar olduğu üçün qiymət məsələsində fərqli yanaşmaların şahidi oluruq:
"Bəzi sahibkarlar fikirləşir ki, obyektə nə qədər xərc sərf olunubsa (təmirinə, avadanlıqlarına və s.), bunu tez bir zamanda çıxarmalıdır. Buna görə də istədikləri qiymətləri aldıqları məhsulun üzərinə qoyub satırlar. Sovet vaxtında belə bir kitab var idi və orada qeyd olunmuşdu ki, hər satılan məhsulun üzərinə 45 faizdən artıq qoymaq olmaz. Amma indi bəzi restoranlar məhsulun üzərinə 100 faizə qədər, bəzi hallarda daha çox pul qoyurlar. Azərbaycanda hazırda bunu tənzimləyən qayda yoxdur, azad bazar iqtisadiyyatına uyğun olaraq qiymətlər qoyulur. Hər sahibkar öz vicdanı ilə qiymətləri tənzimləməlidir. Hər bir sahibkarın obyekt, kommunal, işçi, vergi xərcləri fərqli olduğu üçün sahibkar məcbur olur ki, xərclərini məhsulun üzərinə əlavə etsin. Bu digər sahələrdə də belədir, bütün xərclər satılan məhsulun üzərinə hesablanır”.
M.Əhmədzadə deyir ki, bəzən şərikli bizneslərdə yüksək qiymət təyin edilməsi halları olub: “Təcrübədə bəzi hallar var ki, məsələn, sahibkar 50 manata alınan məhsulu 75 manata satarsa, burada 25 manat gəliri var, amma bu biznes şərikli olduğu üçün hər sahibkar müəyyən məbləğdə pul düşsün deyə, daha baha məhsulu qiymətə satırlar. Ümumilikdə, təcrübəli restoran sahibkarları şişirdilmiş qiymətlər ilə deyil, bazara uyğunlaşaraq daha səmərəli işləyə bilirlər".
Əvəz Həsənov
Mətndə səhv varsa, onu qeyd edib ctrl + enter düyməsini basaraq bizə göndərin.
Son xəbərlər
Ən çox oxunanlar
- Bu gün
- Bu həftə
- Bu ay