"Qiymət artdıqca əhali çaydan daha az istifadə edir"
“Bu gün Azərbaycanda çox az çay istehsal olunur. Çayla bağlı iki dəfə dövlət proqramı qəbul edilib. Artıq bir neçə ildir ki, istehsal artmır. Bu da onunla bağlıdır ki, çay plantasiyaları olan sahələrə ciddi fikir verilmir”.
Bunu Valyuta.az-a açıqlamasında iqtisadçı ekspert Vahid Məhərrəmli deyib. O bildirib ki, çayın qiymətinin artım səbəbindən istehlakda da nisbətən azalma var:
“İstehlaka nəzər salanda xeyli azalma müşahidə edilir. Bunun da səbəbi qiymət artdıqca əhali çaydan daha az istifadə edir. Görünür qənaət edirlər. Əvvəllər çaynikə iki çay qaşığı atırdılarsa indi bir çay qaşığı atırlar. Azərbaycan sovet dövründə 30 min tondan çay istehsal edirdisə, indi bu rəqəm 1000 tona enib”.
Vahid Məhərrəmli təklif edir ki, sahəyə ucuz kredit resursları verilməlidir:
“Özü də uzun müddətə. Çayçılığı qısa müddətə inkişaf etdirmək mümkün deyil, bunun üçün 10 illər tələb edilir. Biz bu sahədən yaxşı gəlir əldə edə bilərik. Azərbaycan çay ixrac edən ölkə olub, digər ölkələrə çay göndərmişik. İndi bizim idxaldan asılılığımız artır və qiymətlər də bu səbəbdən get-gedə bahalaşır”.
Qeyd edək ki, son beş ildə xaricdən aldığımız çayın qiyməti kəskin artıb. 2023-cü ildə xaricdən Azərbaycana 13 min 675 ton çay gətirilib.
Aylin
Mətndə səhv varsa, onu qeyd edib ctrl + enter düyməsini basaraq bizə göndərin.
Son xəbərlər
Ən çox oxunanlar
- Bu gün
- Bu həftə
- Bu ay