"Hayat Park Residence" Qapalı Səhmdar Cəmiyyəti (QSC) təşkilati-hüquqi formasını yenidən dəyişməklə bağlı qərar verib. Şirkət təşkilati-hüquqi formasını dəyişərək Mənzil-Tikinti Kooperativinə (MTK) çevrildiyini elan edib.

Qeyd edək ki, “Hayat Park Residence” 2021-dək MTK olub, sonradan təşkilati-hüquqi formasını dəyişərək QSC-yə çevrilib. İndi isə yenidən MTK statusuna qayıdır. 

Maraqlıdır, bir şirkət nədən tez-tez özünün təşkilatı-hüquqi formasını dəyişir? Bunu etməkdə şirkətin məqsədi nədir? 

Valyuta.az-a açıqlamasında iqtisadçı ekspert Natiq Cəfərli bildirir ki, şirkətlər əsasən məsuliyyət və öhdəliklərdən yayınmaq üçün tez-tez hüquqi formalarını dəyişir:

“Qanunvericilikdə şirkətlərin hüquqi statuslarının dəyişdirmələrinə heç bir məhdudiyyətlər qoyulmur. Onlar MMC, QSC də olar, formalarını da dəyişdirə bilərlər. Qanunda bununla bağlı hansısa bir məhdudiyyət yoxdur. Burada maraqlı olan məqam odur ki, belə şirkətlər tez-tez hüquqi formalarını dəyişdirməklə nəyə nail olmaq istəyir? Bəziləri kredit tarixçələri pis olduğundan quruluş formasını dəyişməklə yeni kredit tarixcəsinə qovuşmaq istəyir. Bəziləri də məsuliyyətdən, müəyyən öhdəliklərdən yayınmaq üçün buna gedir. Vergi və digər yoxlayıcı dövlət orqanların bununla bağlı araşdırma aparmaq səlahiyyəti var”.

Ramiz