“Bu çox kiçik rəqəmdir. Azərbaycanın illik avtomobil idxalı 10 minlərlə hesablanır. Düzdür, rəqəmlər iki dəfə böyük görsənir, amma bunlar ölkənin daxili tələbatı üçün əhəmiyyətsiz rəqəmlərdir”.

Bunu Valyuta.az-a açıqlamasında iqtisadçı ekspert Xalid Kərimli Azərbaycanda 2023-cü ilin müvafiq ayı ilə müqayisədə minik avtomobili istehsalının artımından danışarkən deyib. Ekspert əlavə edib ki, Azərbaycanda avtomobil istehsalı deyəndə gətirilən hissələrin yığımından söhbət gedir:

“Azərbaycanda avtomobil sənayesi yoxdur. Hökumət avtomobil hissələrini vergidən azad edib. Ona görə də hissələri gətirib burada yığmaq bir qədər əlverişli vəziyyətə gəlib çatıb. Məsələn, biri deyə bilər ki, dünyanın heç bir ölkəsində avtomobil tək yığılmır”.

Xalid Kərimli 2022-ci illə müqayisədə 2023-cü ildə avtomobil idxalının artdığını vurğulayıb. Ekspert həmçinin avtomobilin dəyərinin artdığını da əlavə edib: 

“Onun da səbəbi 2023-cü ilin aprelin 1-dən etibarən ölkəyə 10 ildən çox istismarı olan avtomobillərin ölkəyə buraxılaması haqqında qaydaların qüvvəyə minməsi oldu. Əhali daha çox yeni avtomobillər almağa başladılar. Eyni zamanda da elektrik və hibrid mühərrikli avtomobillərə ciddi vergi güzəştlərinin tətbiq edilməsi oldu”.

Qeyd edək ki, Dövlət Statistika Komitəsinin məlumatına görə, bu ilin yanvar ayında Azərbaycanda 406 ədəd və ya 2023-cü ilin müvafiq ayı ilə müqayisədə 211 ədəd və yaxud 2,1 dəfə çox minik avtomobili istehsal olunub. 

Aylin