"Yeni qayda mütəxəssislərin yüksək göstəricilərlə əmək bazarına daxil olmasına imkan verəcək"
Elm və Təhsil Nazirliyindən məlumatına görə, 2024-cü ilin sentyabrın 15-dən təhsil sistemində yeni qaydalar tətbiq olunacaq.
Qaydalara əsasən, təcrübənin təşkili zamanı tədris-öyrənmə və təcrübə arasında davamlı əlaqənin qurulması, tələbənin yaradıcılıq və tədqiqat işlərində iştirakının təmin edilməsi, tələbənin müasir texnologiyalarla, iş üsulları və digər yeniliklərlə tanış edilməsi, təcrübə bazasının infrastrukturunun əlilliyi olan tələbələr üçün müyəssər olması, tələbələrin təcrübə bazasında məşğulluq imkanlarının nəzərə alınması əsas öhdəliklər kimi müəyyən olunub.
Təcrübə təhsil müəssisəsindən kənarda keçirildiyi halda, təhsil müəssisəsi ilə təcrübə bazaları arasında müqavilə bağlanılacaq. Tələbənin əmək fəaliyyəti təcrübə komissiyası tərəfindən təcrübə kimi tanına bilər. Bu zaman əmək fəaliyyətinin hər bir həftəsi 1,5 kreditə bərabər tutulur. Tələbənin təcrübə müddətində beşgünlük iş rejimi üzrə həftəlik təcrübə keçməsi müddəti ən azı 20 saat olmalıdır. Bu müddət, ixtisasın profilindən asılı olaraq, təhsil müəssisəsi tərəfindən artırıla bilər.
Valyuta.az-a açıqlamasınsa təhsil eksperti Kamran Əsədov bildirir ki, bu addım mütəxəssislərin yüksək göstəricilərlə əmək bazarına daxil olmasına imkan verəcək:
“İlk növbədə onu deyim ki, Azərbaycanın 51 ali təhsil müəssisəsində 187 min və 51 orta ixtisas təhsil müəssisəsində 30 minə yaxın tələbə təhsil alır. Nazirlər Kabineti tərəfindən təsdiq edilmiş qaydalara əsasən tələbələt təhsil aldıqları müddətdə istehsalat təcrübəsində olmalıdır. Onun mahiyyəti odur ki, tələbələr əldə etdikləri nəzəri bilikləri praktik olaraq təcrübədən keçməli və bu bilikləri möhkəmləndirməlidirlər. Azərbaycan təhsil sistemi 2005-ci ildən Boloniya sisteminə qoşulub. Burada ən vacib məqamlardan biri tələbələrin istehsalat təcrübəsi müddətinin artmasıdır.
Bu qaydalar ali və orta ixtisad təhsili sahəsində keyfiyyəti artıracaq. İndiyə qədər bunlar formal xarakterli idi və o qədər də kritik əhəmiyyəti yox idi. Amma artıq istehsalat təcrübəsi 1,5 kreditlə qiymətləndiriləcək. Nəticədə tələbələrə əmək fəaliyyətinə başlamamışdan əvvəl müəyyən təcrübəyə malik olacaqlar.
İşə düzələrkən ali məktəbi bitirənlərdən iş təcrübəsinin olub-olmaması soruşulur. Tələbələrin bu kreditləri isə onların müəyyən təcrübəyə malik olduqlarının göstəricisi olacaq. Bu vəziyyət əmək bazarına daha bilikli və bacarıqlı mütəxəssislərin daxil olmasına gətirib çıxaracaq. İndiyə kimi isə təcrübələr formal xarakter daşıyırdı. İndisə tələbələr bunu tam şəkildə yerinə yetirməli olacaq və buna görə kredit alacaq. İstehsalat təcrübəsini yerinə yetirə bilməyənlər diplom da ala bilməyəcək”.
Ramiz
Mətndə səhv varsa, onu qeyd edib ctrl + enter düyməsini basaraq bizə göndərin.
Son xəbərlər
Ən çox oxunanlar
- Bu gün
- Bu həftə
- Bu ay