Ölkəmizə pul köçürmələrinin sayı niyə azalıb? - Ekspertdən açıqlama
“Rusiya-Ukrayna müharibəsi fonunda Rusiyanın iqtisadi artım templəri aşağı düşüb, biznes sferasında müəyyən daralmalar baş verib”.
Bunu Valyuta.az-a açıqlamasında iqtisadçı ekspert Məhəmməd Talıblı ölkəyə pul köçürmələrinin azalması ilə bağlı səbəblərdən danışarkən deyil. Ekspert hesab edir ki, iqtisadiyyat həcm baxımından kiçilirsə, vətəndaşların həmin iqtisadiyyatdan pay almaq fürsətləri azalır:
“Belə vəziyyətdə vətəndaşlar, biznes subyektləri, bazar iştirakçılarının gəlirləri azalmağa doğru gedir. Rusiyada yaşayan soydaşlarımızın da gəlirləri azaldığına görə, ölkəyə pul baratları formasında göndərilən vəsaitlərin həcmi kiçilib. İkincisi, həm də Azərbaycan bütün quru sərhədləri bağlı saxlayıb və ölkəyə giriş-çıxış məhdudlaşdırılıb”.
Ekspert Rusiya iqtisadiyyatının Qərb və Avropa ölkələrinin sanksiyalarının təsiri altına düşdüyünü qeyd edib:
“Ölkəyə investisiya axını məhdudlaşıb. İnvestisiya axını azaldığına görə ölkədə iqtisadi artımın templəri də aşağı düşür. Belə vəziyyətdə vətəndaşların gəlirləri, bazarda işgüzar aktivlik aşağı düşür. Bunun fonunda vətəndaşların gəlirləri də azalır. Onlar istehlak xərclərdən imkan edib yığımlarını artıra bilmirlər. Gəlir aşağı düşdüyünə görə vətəndaşlar özlərinin zəruri xərclərini çətinliklə qarşılayırlar. Bundan sonra onların yığım etmək üçün vəsaitləri az qalır. Bu da ölkəyə pul köçürmələrinin sayına təsir edir”.
Məhəmməd Talıblı deyir ki, ölkədə maliyyə axınları üzərinə Mərkəzi Bankın ciddi nəzarət imkanları artıb:
“Vətəndaşlardan həmin vəsaitin hansı mənbələrdən əldə olunması, hansı sahəyə vəsaitin köçürülməsi, hansı mənbələrdən daxil olması ilə bağlı Mərkəzi Bank sərt tələblər formalaşdırıb. Ölkəyə 20 mindən çox daxil olan vəsaitlərin üzərində ciddi nəzarət imkanları yaradılıb. Bütün bunların hamısı ölkəyə maliyyə imkanlarının axınını məhdudlaşdırıb”.
Qeyd edək ki, Azərbaycan Mərkəzi Bankının məlumatına əsasən ötən il Azərbaycana xaricdən pul köçürmələri 3,3 mlrd. manatdan çox azalıb. 2022-ci ilə nisbətən sürətli pul köçürmə sistemləri vasitəsi ilə banklara daxil olan vəsaitin həcmi 2.3 dəfə və ya 3 milyard 330.6 milyon manat, banklardan xaricə köçürmələr isə 38.6% və ya 388 milyon manat azalıb.
Aylin
Mətndə səhv varsa, onu qeyd edib ctrl + enter düyməsini basaraq bizə göndərin.
Son xəbərlər
Ən çox oxunanlar
- Bu gün
- Bu həftə
- Bu ay