Hazırda Azərbaycanda kirayə toy maşınlarının biznesi geniş yayılıb. 

Toya hazırlaşan gənclər arzu edirlər ki, bütün hazırlıqları tam olsun, həmin gün onlar üçün xüsusi keçsin. 

Bəzi cütlüklər onları zala aparacaq maşını belə xüsusi seçir. Kimisi klassik maşınlara üstünlük verərkən, bəziləri isə müasir maşınlarla toy məkanlarına getməyi üstün tutur. Bu maşınların isə qiymətləri markasından, gedəcəyi məsafədən asılı olaraq dəyişir. Bakıda bu qiymətlər 90-100 manatdan başlayıb 1500-2000 manata qədər və bir az daha artıqdırsa, regionlarda bu qiymətlər daha ucuzdur. 

Gəlin maşınlarının kirayəsi ilə məşğul olan şəxslər isə deyir ki, bazarda tələbat daha çox standart müasir maşınlaradır. Az-az hallarda cütlüklər klassik maşınlara üstünlük verirlər.  Onlar istəsələr maşınları hazır dekor edilmiş formada götürə bilərlər, istəməsələr də öz zövqlərinə görə dekor edirlər. Bir çox hallarda isə bu maşınları kirayə götürməyə görə isə depozit də tələb etmirlər. Bəzi bahalı maşınların qiymətində isə 50-100 manat endirim edirlər.

Bəs bazarda hazırda kirayə gəlin maşınlarının bir günlük qiyməti nə qədərdi. 

Valyuta.az bəzi gəlin maşınlarının bir günlük kirayə qiymətlərini təqdim edir: 

1953-cü il istehsalı olan QAZ “Pobeda” markalı avtomobilin bir günlük kirayə qiyməti 400 manatdır. 

“Bentley” “Mulsanne”nin bir günlük kirayəsi 650 manatdır. 

Ən bahalı gəlin maşınlarına “Rolls Royce”-lar aiddir. “Rolls Royce” markasına aid “Ghost” modeli maşının günlük kirayəsi 999 manatdan 1200 manata qədər dəyişir.

“BMW”, “Mercedes” markalarına məxsus maşınların qiymətləri isə 90, 100, 150, 500 manat arası dəyişir. 

Davud