İş müsahibəsində ofis proqramları bilikləri, xüsusilə də “Excel”dən istifadə bacarığı tez-tez soruşulur. Bəzən iş üçün müraciət edənlər bildirirlər ki, buna iş prosesində ehtiyac olmadığı təqdirdə belə soruşurlar, bəzi işlərdə heç lazım olmur. “Excel”dən istifadəni hansı səviyyədə bilməliyik? Bu bilik işə qəbulda nə dərəcədə önəmlidir?

Bu barədə Valyuta.az-a danışan “Excel” təlimçisi Tunar Süleymanlı bildirib ki, hər kəs öz işlərini görəcək səviyyədə bu proqramı bilməlidir: “Excel çox geniş bir proqramdır. Əlbəttə ki, hər insanın nə qədər çox “Excel” biliyi olsa, bu onun üçün üstünlükdür. “Excel”də çox məlumat bilən adam istər-istəməz onun içərisindəki əməliyyatları daha sürətli edəcək və bununla da vaxt qazanmış olacaq. Bununla belə, deyə bilmərik ki, hər kəs o geniş səviyyədə bu proqramı bilməlidir. Hər işdə fərqli səviyyədə bilmək tələb olunur. Hər bir işçinin öz işlərini görə biləcəyi dərəcədə bunu bilməsi kifayət edər. Məsələn, biz ofis menecerindən geniş hesabatlar, analizlər aparmasını, qrafiklər qurmasını tələb edə bilmərik”.

Təlimçi bu proqramdan istifadə edilməsinin işə qəbul prosesindəki rolundan da danışıb: “Excel” proqramının işə qəbul prosesindəki rolu çox böyükdür. Əlbəttə ki, hər bir işə götürən yuxarıda qeyd olunan işlərin sürətli, daha tez edilməsi üçün bu proqramı bilən işçi axtarması normaldır”.

Əvəz Həsənov