Azərbaycanda özəlləşdirmə bazarını necə canlandırmaq olar? - İqtisadçı şərtləri açıqlayır
“Özəlləşdirmə 1990-cı illərdən qəbul olunmuş qaydalara görə əslində çox ciddi maraq cəlb edən sahələri əhatə etməli idi. Lakin yalnız Bakı şəhərində yerləşən bəzi zavod və fabriklərin özəlləşməsi baş verdi ki, bu da əsasən onların üzərində yerləşdiyi torpağın qiymətli olmasına görə idi”.
Bu sözləri Valyuta.az-a iqtisadçı Natiq Cəfərli ölkədə özəlləşdirmə ilə bağlı proseslər haqqında danışarkən deyib.
İqtisadçı deyib ki, əsasən şəhərin mərkəzi və mərkəzinə yaxın sənaye obyektləri elə həmin müəssələrin direktorları tərəfindən müxtəlif üsullarla özəlləşdirildi, onlar səhmdar cəmiyyətlərə çevrilmədi, səhm buraxılmadı, səhm bazarına töhfə vermədi, bazarda canlanma baş vermədi:
“Şəhərin mərkəzində torpağın dəyərli olmasına görə bu baş verdi və daha çox həmin ərazilərdə binaların tikildiyini gördük. Təəsüf ki, bu trend hələ də davam edir. Bakı şəhərində keçmişdə olan müəssələrin yerində indi çoxmərtəbəli binalar görürük”.
Həmsöhbətimiz qeyd edib ki, bu gün dövlətin əlində olan çox maraqlı aktivlər var ki, onların da özəlləşməsinə dövlət hələ qərar vermir:
“Doğrudur, bununla bağlı müəyyən qərar oldu, bir çox böyük müəssələri özündə birləşdirən İnvestisiya Holdinqi yaradıldı. Bu qərarın preambula hissəsində özəlləşməyə hazırlıq məsəsləsi də qeydə alınmışdı. Amma iki ildən çox vaxt keçib, hələ də böyük və maraqlı müəssələrin səhmdar cəmiyyətə çevriləcəyi ilə bağlı hansısa qərarı biz görmədik. Bunun isə bir neçə səbəbi var: daxili investorların az olması, xarici investorların da müəyyən şərtlər daxilində bu sahələrə yatırım qoymaq istəməsi. Əsasən də məhkəmə islahatları, idarəetmə ilə bağlı bəzi problemlər, gömrük, vergi rüsumları, Azərbaycanın Ümumdünya Ticarət Təşkilatına üzvlük və s. bu tipli hələki həll olunmamış məsələlər var ki, xarici investorlar bunun həllini gözləyirlər.
Hələki bununla bağlı müsbət siyasi bəyanlar olsa da, qərarlar verilsə də praktiki addımlar atılmır”.
Natiq Cəfərli düşünür ki, ölkədə dövlətin əlində olan yüzlərlə çox maraqlı aktivlər var. Onların səhmdar cəmiyyətə çevrilməsi ilə bağlı qərar verilsə və səhmdar cəmiyyətlərin yaradılma prinsipinə uyğun olaraq səhmlərin dövriyyəsi təşkil olunsa, bu sahə Azərbaycanda ciddi maraq görə bilər və səhm bazarının inkişafına da səbəb ola bilər:
“İndi hələki İnvestisiya Holdinqinə daxil olan və olmayan böyük dövlət müəssələrinin səhmdar cəmiyyətlərə çevrilib öz aktivlərini, səhmlərini satmaqla bağlı qərar yoxdursa, bunun səhm bazarında ciddi aktivliyə səbəb olmamasının qiymətli kağızlar bazarında aktivliyin az olmasının əsas səbəblərindən biridir. Əgər səhmdar cəmiyyətə çevrilməsi ilə bağlı, səhmlərin buraxılması, onların birjada dəyərinin müəyyənləşdirilməsi, satış həcmləri və satış üçün nəzərədə tutlan infrastrukturun qurulması ilə bağlı siyasi qərar olsa düşünürəm ki, bu, Azərbaycanda prespektivli sahəyə çevrilə bilər”.
Davud
Mətndə səhv varsa, onu qeyd edib ctrl + enter düyməsini basaraq bizə göndərin.
Son xəbərlər
Ən çox oxunanlar
- Bu gün
- Bu həftə
- Bu ay