“Sahibkarlığın İnkişafı Fondu işğaldan azad olunan ərazilərin inkişafında sahibkarlara dəstək verəcək”.

Bunu Valyuta.az-a açıqlamasında iqtisadçı ekspert Cəfər İbrahimli deyib. O, işğaldan azad edilən ərazilərə “Böyük qayıdış”la bağlı birinci Dövlət Proqramının təsdiq olunduğunu qeyd edib:

“Həmin Dövlət Proqramının tədbirlərində Sahibkarlığın İnkişafı Fondu da nəzərdə tutulub. Bu fond mandatına uyğun olaraq güzəştli kreditlərlə regiondakı layihələri maliyyələşdirməlidir. Sahibkarlığın İnkişafı Fondu Azərbaycanın bütün rayonlarına layihələr üzrə maliyyə verirdi. Bundan sonra daha çox diqqət işğaldan azad edilən ərazilərə ayrılacaq”.

Cəfər İbrahimli bildirib ki, fond sözügedən ərazilər üçün qalib layihələri aşağı faizlə güzəştli kreditlərlə təmin edəcək:

“Prosesə fevral ayından başlanılacaq”. 

Qeyd edək ki, İqtisadiyyat Nazirliyi yanında Sahibkarlığın İnkişafı Fondunun İdarə Heyətinin sədri Osman Xaliyev 2023-cü ildəki fəaliyyətin yekunlarına həsr olunmuş mətbuat konfransında bildirib ki, Azərbaycanın işğaldan azad olunmuş ərazilərində fəaliyyət göstərən sahibkarlara dəstək üzrə yeni mexanizm yaradılır.

Aylin