Qurulan bizneslərin bir çoxu fəaliyyət göstərə biımir. Hər hansı səbəbdən uğursuz olur, inkişaf edə bilmir. Bəzən çox pul yatırılır, dizayn və yerləşmə də yaxşıdır, amma biznes inkişaf etmir. Yeni yaradılan bizneslər niyə inkişaf etmir?

Valyuta.az-a rəqəmsal marketinq və biznesin inkişafı üzrə menecer Rəqsanə Məmmədovanın bu mövzuda yazısını təqdim edir.

Orta hesaba görə, bizneslərin 90 faizi ilk 3 il ərzində bağlanırlar. Bu yalnız Azərbaycanda deyil, bütün dünyada belədir. Bunun müxtəlif səbəbləri var. Onlar aşağıdakı kimidir. 

1. Maliyyə dözümlüyünün az olması

Çox az bizneslər ilk fəaliyyət dövrlərində gəlir gətirir. Şirkətlərin əksəriyyəti ilkin mərhələdə ziyana işləyir. Hətta bəzən 2-3 il şirkət ziyana işləyə bilər. Yetəri qədər maliyyə vasitəsi olmasa, şirkətlər bağlana bilər. Məhşur amazon.com saytı 5 ildən artıq ziyana işləyib. 

2. Rəqib üstünlüyünün olmaması

Ümumən rəqib üstünlüyü qoruyub saxlamaq lazımdır. Müştəri cəlb edib, təkrar satışları təşkil etmək üçün məhsul rəqiblərdən fərqlənməlidir. Yoxsa alıcı başqa şirkətə gedəcək. Nə vaxtsa mobil telefonlar bazarının kralı sayılan "Nokia" və "Black Berry" bazar paylarını, "Apple" şirkətinə  verdilər.

3. Kadr siyasəti

Şirkət yeri yarananda düzgün və effektiv komanda üzvləri cəlb etməlidir. Çünki yalnış kadrlar şirkəti uçuruma apara bilər. Müasir şirkətləri güclü edən bir şəxs deyil, bir ideya ətrafında birləşən komandalardır.

4. Marketinq büdcələrinə qənaət

İndiki dövrdə çox defisit çox az bazarlarda var. Əksinə təklif tələbatdan çoxdur. Bu səbəbdən müştərinin diqqətini cəlb etmək üçün marketinq  büdcələrinə maksimum dərəcədə pul ayrılmalıdır. Bura endirim kampaniyaları, reklam büdcələri, promo aksiyalar və s. daxildir. 

5. Satış strategiyasının səhv yaradılması

Ümumən mən hesab edirəm ki, şirkət yaratmamışdan əvvəl satışı düşünmək lazımdır. Satış şirkətin döyünən ürəyidir. Satış sistemi səhv qurulsa, şirkətə daim pul gəlməsə, onun ayaqda qalması mümkün deyil. 

6. Qiymət müharibələri

Çox şirkətlər düşünür ki, ucuz qiymət təklif etməklə qısa müddət ərzində çoxlu sayda müştəri cəlb edə bilərlər. Amma ucuz qiymət kapitalın gəlirlik səviyyəsini azaldır. Yəni müştərin olur, amma gəlirlərin azalır. Rəqib şirkətdə cavab olaraq qiyməti azaltsa, yeni şirkət məcbur olub yenə də qiyməti salmalıdır. Bunun sonu uğursuzluqdur. Şirkət yalnız ucuz qiymət üzərində qurula bilməz.