İnsanlar bazarlara əvvəlki kimi üz tutmurlar. Bazara tələbat zamanla azalır. Maraqlıdır, ənənəvi bazarlar öz mövcudluğunu qoruyub saxlaya biləcəkmi?

Valyuta.az-a danışan iqtisadçı Eldəniz Əmirov bazarlara tələbatın azalmasının birinci səbəbinin insanların xidmət səviyyəsini daha yüksək səviyyədə tələb etməsi olduğunu vurğuladı: “Yəni bazarlara tələbatın azalması kənd təsərrüfat mallarına və ya bazarda satılan məhsula tələbin azalması demək deyil. Sadəcə olaraq bazarlar öz formatını dəyişib. Əvvəllər bazar və dükan anlayışı var idi, hazırda bu iki ifadə bir yerdə - böyük supermarketlər şəbəkəsində birləşib. İri ticarət şəbəkələri artıq bazarları da özünə birləşdirib”.

İqtisadçı bazarların gələcəkdəki fəaliyyətindən də söz açıb: “İnsanlar bir istiqamətə getdiyi halda lazım olan bütün tələbatlarını yerinə yetirmək istəyir. Yəni insanlar bazardan meyvə-tərəvəz alıb, ərzaq üçün marketlərə üz tutmaq istəmir. Bu səbəbdən artıq tədricən ənənəvi bazarlar öz fəaliyyətini dayandıracaq”.

Əvəz Həsənov