Qeyri-neft məhsullarının ixracındakı artımın səbəbi nədir?
İxracın və İnvestisiyaların Təşviqi Agentliyinin- AZPROMO-un məlumatına görə 2023-cü ilin yanvar-dekabr aylarında Azərbaycanın qeyri-neft ixracının dəyərində tarixi maksimum qeydə alınıb. Belə ki, 2023-cü ildə Azərbaycandan 3,348 mlrd. ABŞ dolları dəyərində qeyri-neft məhsulları ixrac olunub. Bu, 2022-ci illə müqayisədə 9,8 faiz çoxdur.
Görəsən, bu artıma hansı amillər təsir edib?
Valyuta.az-a açıqlamasında iqtisad elmləri doktoru, professor Elşad Məmmədov bildirir ki, ilk növbədə dünya miqyasında inflyasiyanın yüksək həddi pul dəyərində qeyri-neft ixracatının artımına səbəb olub:
“Burada bir sıra amilləri qeyd etməliyik. Bu cür təhlillər aparılarkən, dünya iqtisadiyyatındakı proseslərə diqqət yetirməliyik. İnflyasiyanın sürətlənməsi qeyri-neft sektoru üzrə ixracın pul dəyərində artımına səbəb olub. Yəni artım fiziki, natural dəyərdə olan artım deyil. Dünyada dollar nisbətində hansı məhsulun qiyməti artıbsa, istər-istəməz həmin çoxalma qeyri-neft ixracatının dollar ifadəsində də əks olunur.
Digər tərəfdən, həmsöhbətimizə görə, qeyri-neft sektoru üzrə əsas ticarət tərəfdaşımız olan Rusiya bazarında baş verən proseslər də həmin artıma rəvac verib:
“Rusiyanın Qərblə problemləri və qarşılıqlı sanksiyalar Azərbaycanın qeyri-neft ixracatının həmin istiqamət üzrə genişlənməsinə yeni imkanlar açıb. Habelə, dövlətin qeyri-neft ixracatının təşviqilə bağlı gördüyü tədbirlər də burada öz nəticəsini verib. Əslində, ölkəmizin qeyri-neft sektorunun potensialı indiki səsləndirilən rəqəmlərlə müqayisədə daha çoxdur”.
Ramiz
Mətndə səhv varsa, onu qeyd edib ctrl + enter düyməsini basaraq bizə göndərin.
Son xəbərlər
Ən çox oxunanlar
- Bu gün
- Bu həftə
- Bu ay