“Rəsmi rəqəmlərə istinadən deyə bilərəm ki, Azərbaycanda məktəb tikintisi son illərdə sürətlə aparılır. Azərbaycanın ən ucqar kəndlərində belə şagirdlər yeni məktəblərdə təhsil alırlar”.

Bunu Valyuta.az-a açıqlamasında təhsil eksperti Kamran Əsədov Elm və Təhsil Nazirliyinin 2023-cü ildə 40 təhsil müəssisəsində tikinti-quraşdırma işləri aparılması ilə bağlı statistikasından danışarkən deyib. Kamran Əsədov vurğulayıb ki, ölkəmizdə 4472 orta məktəb binası var:

“Son 10 il ərzində onların 3 mindən çoxu təmir olunub. Hazırda normal təhsil mühiti, şəraiti olmadığı, qəzalı vəziyyətdə olan məktəblər də var. Məsələn, 2017-2020-ci ildə ölkəmizdə 700 dən çox yeni məktəb tikilib, 44 məktəbdə əsaslı, 500-ə yaxın məktəbdə isə cari təmir aparılıb. Amma bu məktəblərin hamısı regionlarda yerləşir və az saylı şagird tutumuna malikdir. Ona görə də böyük vəsait sərf edib yeni, böyük məktəb binası inşa etməkdənsə, modul tipli məktəblər inşa etməklə bu problemi həll etmək olar”.

Kamran Əsədov bildirib ki, modul tipli məktəblərdən Avropa və Amerikada istifadə edilir:

“Bu daha çevikdir, sökülüb-daşınması daha optimaldır, təhlükəsizlik yüksək səviyyədədir, daha keyfiyyətli dizayn əsasında formalaşdırılır. Ənənəvi məktəblərdə daha çox tikinti materiallarından istifadə olunur. Bu gün ölkədə yüzlərlə qəzalı vəziyyətdə, hər an ucub, dağılıb ciddi fəsadlar törədə biləcək məktəb binaları var. Ölkənin iqtisadi gücü bütün məktəb binalarını müasir standartlara cavab verəcək səviyyədə təmin etməyə imkan verir”. 

Aylin