“Aktivlər verilən kreditlərin hesabına artır”.

Bunu Valyuta.az-a açıqlamasında iqtisadçı ekspert Əkrəm Həsənov Azərbaycanda bank sektorunun aktivlərinin artım səbəblərini izah edərkən deyib. Ekspert bildirib ki, sahibkarların, hüquqi şəxslərin banklarda saxladıqları vəsaitlərin sayının artması da burada mühüm rol oynayır: 

“Düzdür, artım elə də böyük deyil. Aktivlər nəyin hesabına artır? Banklar daha çox kredit verirlər. Kredit vermək üçün də gərək vəsaitlər olsun. Mərkəzi Bankdan verilən kreditlər də artıb. Əmanətlər, bundan əlavə sahibkarların və hüquqi şəxslərin banklarda saxladıqları vəsaitlər də artıb”.

Əkrəm Həsənov hesab edir ki, bu məsələdə Azərbaycanın vergi qanunvericiliyi mühüm rol oynayır:

“Nağdsız Hesablaşmalar Haqqında qaunvericilik sahibkarları get-gedə məcbur edir ki, vəsaitlərini banklarda saxlasınlar”.

Qeyd edək ki, Azərbaycan Banklar Assosiasiyasının (ABA) prezidenti Zakir Nuriyev bildirib ki, 2023-cü ilin yekunlarına görə, Azərbaycanda bank sektorunun aktivləri 2022-ci ilin sonuna olan göstərici ilə müqayisədə 4,5 faiz artaraq, 49,2 milyard manata çatıb.

Bundan əlavə, bankların kredit portfeli 2022-ci ilin sonuna olan göstərici ilə müqayisədə 18,3 faiz artaraq, 23,2 milyard manata çatıb.

Aylin