Bilik və bacarığı olsa da, bəzi kadrlar iş tapmaqda çətinlik çəkirlər. Bu, onların özləri üçün də sual yaradan məqamdır, elə ətraflarındakı şəxslər üçün də. 

Maraqlıdır, bilik və bacarıqlı kadrların işsiz qalma səbəbi nələrdir? 

HR Hunter şirkətinin qurucusu, İnsan Resursları üzrə konsultant İlkin Mirzəzadə Valyuta.az-a bildirib ki, bilik və bacarığın çox olması heç də həmin bilik və bacarıqların şirkətə tətbiq olunması demək deyil: “Bəzən iş axtaran şəxsin kifayət qədər bilikləri olur, lakin o bilik praktiki əhəmiyyət kəsb etmədiyi və ya praktikada tətbiq edilməsi mümkünsüz olduğu üçün şirkətləri belə şeylər cəlb etmir. Şirkət üçün vacibdir ki, həqiqətən müsahib dediyi nüansları hər hansı yerdə tətbiq etmiş olsun”.

İlkin Mirzəzadə qeyd edib ki, bir namizədin özünü şirkətə hansı parametrlərlə təqdim etməsi də çox vacibdir: “Burada soyuq satış məsələsi də var. Ola bilər ki, çox yaxşı kadrdır, amma CV-si o qədər yaxşı deyil. Şirkət səndən öncə CV-ni görür və CV-in onu cəlb etmirsə, ilk addımda uğursuz olursan. Halbuki o şəxs çox məlumatlı ola bilər, amma soyuq satışda uduzur. Bəzən işaxtaran şəxs çox bilir, CV-si yaxşı olur, ancaq müsahibədə özünü sata bilmir, ona görə də digər şəxslərdən geridə qalır. Ona görə, iş axtaran şəxs prosesləri öyrənməli və rəqabət mühiti üçün hazır olmalıdır”.

Əvəz Həsənov