“Ölkədə artıq uzun müddətdir ki, gəlirlərin göstərilməsi ilə bağlı müəyyən məsələlərə toxunulur. Hansı mənbədən gəlirlər əldə olunur, pullar hardan gəlir və s-in mənbəyi göstərilməlidir. Bu qanunun bir tələbidir”. 

Bunu Valyuta.az-a əmlak məsələləri üzrə ekspert Elnur Əsədov mənzil alqı-satqısı ilə bağlı bir müddətdir ölkədə qüvvəyə minən yeni qanunu şərh edərkən deyib. 

Elnur Əsədov deyib ki, bu ildən artıq mənzil alarkən gəlir mənbəyinin gösətrilməsi ilə bağlı tələbnamə var. Lakin burda maraqlı nüanslar da var:

“Qanunvericilkdə müəyyən tələblər var ki, onların açıqlanması vacibdir. Məsələn, həmin mənzil hansı dövrdə alınıbsa göstərilməlidir.  Təzə alınmış mənzildirsə, yəni son bir-iki ildə alınıbsa, onu təkrar satıb yeni mənzil alırsa, bu halda həmin şəxsin gəlirinin mənbəyini göstərməsi daha məqsədə uyğun olur. Amma mənzili keçmiş zamanda alıb-satıbsa, həmin ev miras payı ola bilər, valideynindən ona qalmış əmlak ola bilər. Yəni bunların müəyyən tarixçəsini göstərməyə ehtiyac var”.

“Bu qanun ev alqı-satqısında problem yaradacaqmı” sualəna cavab olaraq Elnur Əsədov bildirib ki, belə tələblər ola bilər ki, bürokratik əngəllərə yol verəcək, yaxud da vətəndaşlar çalışacaq ki, yeni inşa olunmuş binalardan mənzillər alsınlar:

“Amma nə vaxtsa onların təkrar satışı məsələsi üzə çıxacaqsa yenə belə problemlərlə üzləşəcək. Bunu da zaman göstərəcək. Hələlik bu mövzuda nəsə demək çətindir. Amma hansı mənbədən gəlir əldə olunubsa, onun göstərilməsi qanunun tələbidir”. 

Ekspert son olaraq vurğulayıb ki, bu qanun yeni inşa edilmiş binalardakı mənzillərin qiymətinin artmasına da təsir edə bilər. 
Qeyd edək ki, bu ildən mənzil almaq istəyən şəxslər xərclədiyi vəsaitin mənbəyini göstərməli olacaq. 

Davud