Bu gün fermerlərin əsas problemlərindən biri də bazara birbaşa çıxışının olmamasıdır. Əvəzində isə iş adamları onların yetişdirdiyi məhsulu alıb istehlakçılara daha baha qiymətə satır. Nəticədə məhsulu istehsal edən fermerlərlə müqayisədə, iş adamları onların məhsulunu satmaqla daha çox qazanc əldə edir. 

Necə etmək olar ki, fermerlər öz məhsullarını birbaşa bazara, marketlərə çıxarmaq imkanı əldə etsin? 

Valyuta.az-a açıqlamasında iqtisadçı ekspert Natiq Cəfərli bildirir ki, bunun üçün fermerlərə birbaşa marketlər şəbəkəsilə müqavilə bağlamaq imkanı yaradılmalıdır: 

“Əsas bazar paytaxtda yerləşib. Çünki ölkə əhalisinin az qala 35-40 faizi Bakıda yaşayır. Bakıda isə ənənəvi bazarlar demək olar qalmayıb. Ənənəvi bazarları marketlər şəbəkəsi əvəzləyib ki, hər birinin də kənd təsərrüfatı məhsullarının satıldığı ayrıca bölmələri var. Məhsul istehsal edən fermerlərin isə birbaşa həmin şəbəkələrə çıxış imkanları yoxdur. Bir neçə ara şirkət fermerlərin məhsulunu alıb, həmin marketlərə satışa təqdim edir, nəticədə aqrar sahədə çalışanla müqayisədə onlar daha çox qazanırlar. Fermerlərə marketlər şəbəkəsinə birbaşa çıxış imkanları yaradılsa, problem öz həllini tapacaq”.

Ramiz