“Mərkəzi Bank növbəti həftələrdən gəlirlilik əyrisinin statistikasını öz saytında yerləşdirəcək”. 

Bunu iqtisadçı Xalid Kərimli Valyuta.az-a dedi. Onun sözlərinə görə, Azərbaycan Mərkəzi Bankının sədri Taleh Kazımov iqtisadçı-ekspertlərlə görüşündə bu barədə məlumat verib.

“Gəlirlilik əyrisinin statistikasının cəmiyyətə açıqlanması çox əhəmiyyətli addımdır. Bu həm də iqtisadiyyata dair bazar iştirakçılarının gözləntisini təxmin etmək, böhranın olub-olmayacağını, gəlirliliyin nə cür dəyişəcəyini başa düşmək üçün əhəmiyyətli məlumat olacaq. Mərkəzi Bank 30 illik tarixində bu statistikanı ilk dəfə yayımlamağa başlayacaq. Çox faydalı olacaq”.

Xalid Kərimli bildirdi ki, görüşdə Mərkəzi Bankın edəcəyi başqa bir yenilik barədə də məlumat verilib: 

“Mərkəzi Bank ilk dəfə olaraq gələn ilin yanvarında 3 illik strategiyasının planını cəmiyyətə təqdim edəcək. Bu da çox yaxşıdır. Mərkəzi Bankın planları haqqında əvvəlcədən xəbər verəcək ki, hansı işləri planlaşdırır, hansı məsələlər vurğulanacaq. Mərkəzi Bankın kapital bazarlarının inkişaf etdirilməsi, infrastrukturun və etimad mühitinin yaradılması üçün tədbirləri, planları var. Bu addım da təqdirə layiqdir”.

Nuray