Ötən həftə Milli Məclisə daxil olan “Dövlət rüsumu haqqında” qanuna dəyişiklik layihəsinə əsasən, Azərbaycana gətirilən mobil cihazların qeydiyyata alınmasına görə dövlət rüsumunun dərəcələrinin azaldılması nəzərdə tutulub.

Dəyişikliklə satış və digər sahibkarlıq fəaliyyəti məqsədilə hüquqi və fiziki şəxslər tərəfindən idxal olunarkən gömrük rüsumu və əlavə dəyər vergisi tutulmaqla rəsmiləşdirilmiş mobil cihazlar istisna olmaqla, fiziki şəxs tərəfindən şəxsi istehlakı üçün ölkəyə gətirilən mobil cihazların qeydiyyata alınmasına aşağıdakı dövlət rüsumu dərəcələri tətbiq ediləcək.

Bazar qiyməti 100 ABŞ dollarından çox olmayan və foto, videoçəkiliş və internetə çıxış funksiyaları olmayan mobil cihazlar - 15 manat.
Bazar qiyməti 100 ABŞ dollarına qədər olduqda - 20 manat;
Bazar qiyməti 101 ABŞ dollarından 200 ABŞ dollarına qədər olduqda - 30 manat;
Bazar qiyməti 201 ABŞ dollarından 400 ABŞ dollarına qədər olduqda - 40 manat;
Bazar qiyməti 401 ABŞ dollarından 700 ABŞ dollarına qədər olduqda - 50 manat;
Bazar qiyməti 701 ABŞ dollarından 1000 ABŞ dollarına qədər olduqda - 70 manat;
Bazar qiyməti 1001 ABŞ dollarından yuxarı olduqda - 100 manat.

Valyuta.az-a açıqlamasında məsələni dəyərləndirən Liberal İqtisadçılar Mərkəzinin rəhbəri Akif Nəsirli bildirib ki, əslində mobil telefonlara görə, rüsumlar azaldılmamalı, əksinə bu rüsumlar ümumiyyətlə aradan qaldırılmalıdır:

“Bu qanun layihəsinə görə, rüsumların azaldılması heç də bütün növ mobil telefonlara şamil edilmir. Rüsumlar azaldılması yalnız ucuz, qeyri-smartfon telefonlara aiddir. Əslində Azərbaycanda mobil telefonlara görə rüsumun tətbiqi iqtisadi nəzəriyyəyə uyğun deyil. Bu sahə üzrə rüsumları azaltmaq deyil, əksinə tamamilə aradan qaldırmaq lazımdır. İdxal zamanı dövlət rüsumunun vəzifəsi daxili bazarı tənzimləməyə xidmət etməkdir. Yəni ölkə daxilində istehsal olunan məhsulun rəqabətə davamlı olması üçün həmin məhsulun idxalına rüsumlar tətbiq edilir. Azərbaycanda mobil telefon istehsal edilmir. Ona görə də ona münasibətdə rüsumun tətbiqi ümumiyyətlə doğru yanaşma deyil”. 

Ramiz