“Azərbaycanda bu sahə üzrə effektiv nəzarət mexanizmi yaratmaq çətindir”.

Bunu Valyuta.az-a açıqlamasında iqtisadçı ekspert Natiq Cəfərli Azərbaycanda brakonyerliklə mübarizənin ciddi effekt verməməsinə münasibət bildirərkən deyib: 

“Ov üçün ölkəmizdə kvotalar müəyyənləşdirilib. Eyni zamanda, qırmızı kitaba və yaxud az tapılan balıq növlərilə bağlı bəzi məhdudiyyətlər var. Ancaq nəzarət mexanizmi zəif olduğundan Azərbaycanda brakonyerliklə mübarizə ciddi effekt vermir. Nəzarətin zəif olması da prosesi həyata keçirən ştatın az olmasından qaynaqlanır. 

Ekologiya və Təbii Sərvətlər Nazirliyinin bütün ov sahələrində nəzarət mexanizmini yerinə yetirmək imkanı yoxdur. Çünki ərazilər böyük, nəzarətçilərin sayı isə çox azdır. Dünya praktikasında təbliğat mühüm rol oynayır, vətəndaşların özləri də ekoloji məsələ olduğundan bir növ nəzarətçiyə çevrilir və əlaqədar orqanlara zaman-zaman gördükləri faktlarla bağlı məlumat verirlər. Azərbaycanda isə bu ənənə yoxdur. Ölkəmizdə belə işlərə cəmiyyət olaraq pis baxırlar. Ona görə də ölkəmizdə effektiv nəzarət mexanizmi yaratmaq çətindir. Nəticədə də kvotalardan daha artıq ov edən brakonyerlərin sayı getdikcə artır. Onların hanssısa bir formada cəzalandırılmasının da nadir hallarda şahidi oluruq”.

Ramiz