Vergi Məcəlləsinə edilən son dəyişikliklərə görə, qəlyan üçün tütünlər və tütün əvəzləyicilərinin, istehsal məqsədli tütünlər istisna olmaqla, digər çəkilməli tütünlərin hemogenləşdirilmiş və ya bərpa edilən, çeynənilən və ya buruna çəkilən tütünlərin hər kiloqramına görə aksiz qiyməti 30 manatdan 22 manata endirilib.

İqtisadi və Sosial İnkişaf Mərkəzinin sədri Rəşad Həsənov Valyuta.az-a açıqlamasında bildirib ki, adətən belə qərarlar qeyd edilən istiqamətlərdə qeyri-leqal fəaliyyətlərin, qaçaqmalçılığın geniş yayıldığı hallarda qəbul edilir:

"Bazarda qeyri-qanuni yollarla ölkəyə gətirilən məhsulların çeşidi artır. Bu da öz növbəsində qara bazarın formalaşmasına gətirib çıxarır. Yəni bir sıra hallarda düzgün olmayan və yaxud risk qiymətləndirilməsi aparılmayan tarif dəyişiklikləri məhsul və xidmətlər üzrə qara bazarın formalaşmasını şərtləndirir. Bu da qaçaqmalçılığı təşviq edir. O mənada ehtimal edirəm ki, tütünün kiloqramına görə aksiz qiymətinin 30-dan 22-i manata endirilməsi qərarı qaçaqmalçılığa qarşı mübarizə məqsədi daşıyır və qara bazarı təşviq edən halları qismən neytrallaşdırmağa xidmət edir. 

Bəzi məhsullar var ki, onun tarifini artırmaqla ölkədə ona olan tələbi aşağı salmaq olar. Tütün kimi məhsullar isə qiymət dəyişikliyinə çox da reaksiya vermir və insanlar onu istehlak etməkdə davam edir. Belə məhsullarda risk qiymətləndirilməsi aparılmadığı halda qoyulan tarif artımına gedilməsi qaçaqmalçılığı təşviq edir. Tütün məhsulları inflyasiya ilə mübarizəyə daxil edilən məhsul növü deyil ki, bu istiqamətdə qərar qəbul edilməkdə qiymət artımının qarşısı alınsın. Bu ona hədəflənmiş yanaşma deyil”.  

Ramiz