Niyə iş tapa bilmirəm?
Bəzi hallarda yüksək təhsil almış, intellektual səviyyəyə malik gənclər də iş tapmaqda çətinlik çəkirlər. Onlar “Müəyyən təcrübə proqramlarına qoşuluram, öz üzərində daim işləyirəm, amma yenə də iş tapa bilmirəm” - deyirlər. Bəs problem nədədir? Həmin şəxslər niyə müraciət etdikləri şirkətlərdən “yox” cavabı alırlar?
UNEC-in müəllimi, “Mazarina Trade Company”də İnsan Resursları şöbəsinin direktoru Saleh Həsənov valyuta.az-a açıqlamasında bildirdi ki, iş axtaran gənclərin çoxunda təhsil sənədi problemi yoxdur: “Əgər bir gənc həm təhsil, həm, təcrübə proqramına sahibdirsə, öz üzərində işləyirsə, o zaman burda ola biləcək problem tamam fərqli ola bilər”.
Müsahib bu problemin bir neçə səbəbi ola biləcəyinə diqqət çədi: “Birincisi, ola bilər ki, əmək bazarının təklifləri həmin gənci qane etməsin. Yəni əmək haqqı və ya təklif olunan şərait və üstünlüklər onun gözləntisinə uyğun olmasın. İkincisi, gəncin doğru istiqamətdə karyerasını qurmaması ola bilər. Yəni gəncin təcrübə proqramı və ya təhsili işləmək istədiyi sahə üzrə deyil. Üçüncüsü, nəzərə alınmayan və ya diqqətdən qaçan məsələlər olur. Bu isə əsasən yumşaq bacarıqları özündə əks etdirir. Gənclərdə bu istiqamətdə problemlər daha qabarıq müşahidə edilməkdədir. Yumşaq bacarıqlar dedikdə dərketmə, kommunikasiya, emosional zəka, komanda işi və onun idarə edilməsivə.s bacarıqlar nəzərdə tutulur. Bu bacarıqları özündə inkişaf etdirməklə iş tapmağın öhdəsindən gələ bilərlər”.
S.Həsənov qeyd etdi ki, iş axtaran zaman bilik, bacarıq və qabiliyyətlər bir-birini tamamlamalıdır: “Əks halda iş tapmaq asan olmayacaq. Gənclər isə öz sahəsində karyera koçu və ya uğurlu karyerasını qurmuş şəxslərdən məsləhət alsınlar və bu onların inkişafına güclü təkan ola bilər”.
Qarakişi Vəlizadə
Mətndə səhv varsa, onu qeyd edib ctrl + enter düyməsini basaraq bizə göndərin.
Son xəbərlər
Ən çox oxunanlar
- Bu gün
- Bu həftə
- Bu ay